Mascuud Cabdi Maxamed waa wiil yar oo liqay bir halis galisay noloshiisa, waxaana reerkiisa ay muddo bil ah baadi goob ugu jireen helidda dhakhtar dhallaankooda yar ka soo saaro birta uu liqay.
Qoyskan oo ku nool magaalada Boosasao ee xarunta Gobolka Bari, isla markaana ah qoys danyar ah ayaa waxaa ka faala qaaday baaritaanka, jiifka iyo qaliinka wiilkooda Mascuud Dr Shaafici Aadan Dirir oo ugu dambeyn ku guuleystay qaliin uu ku sameeyay wiilka yar, kana soo saaray birta uu liqay.
Hooyada dhashay Mascuud ayaa Warbaahinta Qaranka u sheegtay in wiilkeeda lagu guuleystay qaliinkii lagu sameeyay, haatana ay soo wanaagsanaaneyso xaaladiida caafimaad.
Aabaha dhalay Mascuud, Aabe Cabdi Maxamed ayaa Dr Shaafici Aadan Dirir uga mahadceliyay sida uu wiilkooda ugu guuleystay in uu ka soo saaro birta uu liqay,
Dr Shaafii Aadan Dirir ayaa oo dhankiiisa Warbahinta Qaranka la hadlay ayaa Alle uga mahadceliyay sida uu ugu guuleysiiyay qaliinka uu ku sameeyay Mascuud, isagoo xusay in markasta uu diyaar u yahay caawinta dadka tabaaleysan.
“Alle ayan ugu xamdi naqaynaa, waa habeen farxad leh oo aan badbaadinay oo haddii ay ku sii jiri lahayeen ay keeni lahayd in sambabadiisa bidix uusan ka neefsan”. Ayuu yiri Dr Shaafi.
Wallidiinta oo wajiyadooda laga dheehanayey farxad aad u weyn ayaa uga mahadceliyey Dr Shaafii Aadan Dirir dadaalkii ay ku bixiyeen bad baadinta wiilkooda yar ee Mascuud.
