Xaflad balaaran oo ay kasoo qeyb galeen qeybaha kala duwan ee bulshada Soomaaliyeed iyo marti sharaf kale ayaa lagu qabtay magaalada Karachi ee koonfurta wadanka Pakistan.
U jeedada xafladda ayaa aheyd sidii loo dooran lahaa hogaanka cusub ee jaaliyadda Soomaaliyeed magaalada Karachi ee dalkaas, maadaama kii hore waqtiga ka dhamaaday, iyadoo qaban qaabada xafladda loo xil saaray ilaa todono xubnood oo jaaliyadda ka tirsan.
Guddoomiyaha guddiga qaban qaabada xafladda Abu Bakar Xasan Maxamed oo ka hadlay munaasabadda ayaa u mahadceliyay safiirka Soomaaliya ee dalka Pakistan Marwo Khadiija Al-Makhzuumi, oo gacan ka siiyay qabsoomidda xafladda.
Xilka cusub ee hogaanka jaaliyadda ayaa waxaa isu soo sharaxay ilaa afar murashax, iyadoo doorashada cod qarsoodi aheyd uu ku soo baxay Siciid Cabdi Kulane oo heley 74 cod , isagoo ka guuleystay C/fitaax C/qaadir Cismaan oo heley 71 cod.
Doorashada ka dib ayaa qaar kamid ah mas’uuliyiintii ka qeybgashay waxaa ay bogaadiyeen qaabka doorashada, waxaana kamid ah Dr. Xasan Hilowle, isagoo hogaanka cusub ku booriyay dadaal dheeraad ah.
Gunaanadkii xafladda ayaa waxaa hadiyado la gudoonsiiyay safiirka Soomaaliya ee dalka Pakistan iyo qunsuliyadda Soomaaliya ay ku leedahay magaalada Karachi.
Guddoomiyaha cusub ee jaaliyadda Soomaaliya ee magaalada Karachi, ayaa waxaa uu u mahadceliyay dhamaan dadkii ka qeybgalay munaasabada, isagoo codsaday in lala shaqeeyo.
Mursal Mohamud Osman, Karachi-Pakistan.
