Jaaliyadda Soomaaliyeed ee ku nool dalka Turkiga oo ka qeyb qaadatay dibadbax aad u balaaran oo xalay ka dhacay magaalada Ankara kaasoo lagu taageerayay madaxweyne Erdogan.
Qaar ka mid ah jaaliyadda Soomaaliyeed oo la hadlay Radio Muqdisho iyagoo ku sugan fagaaraha dibadbaxu ka dhacayay ayaa sheegay in shacabka Turkiga ay la wadaagayaan dareenkooda ku aaddan madaxweyne Erdugan.
Halkan ka dhageyso wareysiga jaaliyadda Soomaaliyeed ee Turkiga
Xaaladda Turkiga ayaa xalay deganeyd inqilaabkii dhicisoobay kaddib, waxaana dadka oo faraxsan ay isugu soo baxeen waddooyinka, iyagoo calanka Turkiga lulayay iyo sawirka Madaxweynaha.
Madaxweyne Erdogan ayaa meel fagaare ah kula hadlay dadweynaha, waxaana uu sheegay in uu todobaadkan sii socdo dibad baxyada looga soo horjeedo isku daygii afgambigii fashilmay.
Erdogan ayaa ku sugnaa xilliga uu bilaabanayay isku dayga afgambi magaalada loo dalxiis tago ee Marmaris, waxaana markii koox ka tirsan Milateriga qabsadeen meelo muhiim ah, waxaa uu ka hadlay Telefishin gaar loo leeyahay, isagoo isticmaalayay aaladda Face Time oo shacabka dalkiisa uu kala hadlay.
Warbaahinta Caalamka ayaa sheegaya in adeega Face Time ay aheyd midii bur burisay isku daygii afgambi, isla markaana horseeday in shacabka Turkiga ay isugu soo baxaan waddooyinka, iyagoo adeecayay hadalkii Madaxweyne Erdogan.
