Wararka kasoo baxaya bahda kala duwan ee waxbarashada Ethiopia ayaa sheegaya in Jaamacadaha iyo Iskuulada guud ahaan Ethiopia ay soo saari doonaan go’aano lagu jaan goynayo laguna ilaalinayo hanaanka waxbarashada dalkaas si loo fuliyo awaamiirta ay Dawladda Ethiopia soo saartay ee la xiriira xaaladda bandowga dalkan, taasoo saamayn ku yeelan karta goobaha waxbarashada.
Maamulada kala duwan ee Jaamacadaha iyo Iskuulada Ethiopia ayaa sheegay in ay la xiriireen oo ay ka war sugayaan hay’ada ugu sarraysa Ethiopia ee dhinaca tacliinta taasoo ah Wasaaradda Waxbarashada Ethiopia, isla markaana ay go’aan rasmi ah qaadan doonaan marka ay wada tashi la yeeshaan madaxda Wasaaradda.
Ardayda Soomaaliyeed ee wax ka barta Jaamacadaha iyo Iskuulada Ethiopia ayaa warbaahinta Qaranka u sheegay inay macquul tahay in fasax cayiman lasiiyo ardayda, si aysan saamayn ugu yeelan ardayda arimaha bandowga iyo awaamiirta kasoo baxay Dawladda Ethiopia.
Sidoobkale Jaamacadaha ku yaalla Deegaanka Soomaalida gaar ahaan magaalada Jigjiga ayaa la sheegayaa in dhankoodana la filayo inay qayb ka noqdaan go’aanada laga sugayo Wasaaradda Waxbarashada Ethiopia.
Si kastaba ha noqotee, arintan ayaa kusoo beegmaysa xilli Dawladda dhexe ee Ethiopia ay dalkan gelisay xaalad degdeg ah, isla markaana ay arday fara badan oo isaga kala yimi adduunka intiisa kale ay wax ka bartaan Jaamacadaha Addis Ababa iyo gobolada kale ee dalkan Ethiopia.
Waxaana Dawladda Ethiopia ay dedaal ugu jirtaa ilaalinta bedqabka ardayda ajaanibta ah oo ay ka mid yihiin ardayda Soomaaliyeed ee wax ku barta Jaamacadaha iyo Iskuulada Ethiopia, maadaama xaalad degdeg ah ay Dawladdu kusoo rogtay guud ahaan waddankan gaar ahaan caasimadda Addis Ababa.
