Taliyihii hore ee Ciidamada XDS Jeneraal Yuusuf Xuseen “Dhuumaal” kana mid ah Saraakiisha Ciidamada oo isaga oo ku sugan Magaalada Dooloow, la hadlay Radio Muqdisho ayaa tilmaamay ahmiyada ay leedahay in Dowladda ay dib uga qabsato Maleeshiyada Al Shabaab degmada Baardheere ee gobolka Gedo.
Jenaraal Yuusuf Xuseen Dhuumaal ayaa sheegay in dowladda iyo Maamulka Jubba ay labadaba ahmiyad u leedahay Baardheere oo uu sheegay in ay muhiim u tahay in sidoo kale maleeshiyaadka laga saaro gobolada Jubbada dhexe oo xuduud dhow la leh Baardheere.
Ciidamada XDS iyo kuwa AMISOM ayaa fashiliyay isku day Kooxda Shabaab ay ku dooneysay in Qaraxyo ay uga hortagto howlgallada ciidanka XDS.
Dhuumaal oo ka mid ah Saraakiisha Ciidamada ayaa sheegay in Magaalada Baardheere ay hadda baaris ka wadaan Ciidamada, si looga fiirsado falal ammni xuma oo ka imaan kara maleeshiyada Al Shabaab, isaga oo sheegay in qorshahaan ka xiga uu yahay in gacanta lagu dhigo Jubada dhexe.
Ciidamada xoogga dalka ayaa shalay la wareegay Magaalada Baardheere, kadib markii ay halkaasi ka saareen maleeshiyada Al Shabaab, Dowladda Federaalka ayaa sheegtay in sanadkaan gudihiisa lagu qabanayo deegaanada ka maqan gacanta Dowladda.
