Dowladda Mareykanka ayaa sheegtay in 45 Milyan oo dheeraad ah ay ugu deeqeyso hay’adda qaramada Midoobay u qaabilsan qaxootiga ee UNHCR, taas oo gacanta ku heysa xerada qaxootiga ee caalaamka ugu weyn ee Dhadhaab.
Xoghayaha arrimaha dibadda ee Mareykanka John Kerry oo socdaal ku maraya bariga Afrika ayaa hadalkaan ka sheegay dalka Kenya. “Waan ku faraxsanahay inaan ku dhawaaqo in Mareykanku uu hadda biixnayo 45 Milyan oo dheeraad ah oo lagu kabayo howl-galka UNHCR ee Kenya” ayuu yiri Kerrey.
John Kerry ayaa ka hadlay xaaladda ay ku sugan yihiin qaxootiga ku sugan xeryaha Dhadhaab, wuxuu sheegay in arrinta qaxootiga aysan Kenya kaliya quseyn ee ay tahay arrinka caalamka u taalla.
“Arrintaan waa caqabad u talla bulshada caalamka, waa inaan si wadajir ah uga shaqaynaa si aan u damaanad qaadno in dadkaani aysan ku noolaan xeryaha qaxootiga marka ay dhashaan ilaa ay ka dhammeeyaan dugsiga sare, dadkan waa inay guryahooda aadaan” ayuu yiri Kerry.
“Taas waajib ayay nagu tahay, Xeryaha qaxootiga waxaa loogu talo galay inay noqdaan kumeel-gaar, looguma talo gelin inay noqdaan magaalo ku dhex taallla waddan kale” ayuu sii raaciyay.
Xoghayaha arrimaha dibadda Mareykanka ayaa la hadlay dhowr qof oo ku sugan xeryaha Dhadhaab, qaarkood ayaa u sheegay inay ku dhasheen xeryaha oo ay dhammeynayaan iminka dugsiga sare, qaar kale ayaa la wadaagay hammigooda ah inay bulshada wax ku soo kordhiyaan mustaqbal marka ay waxbarashadooda dhammaystaan.
Sidoo kale Kerry wuxuu sheegay in Mareykanku uu sanadkaan boqol milyan oo dollar uu ku bixinayo la dagaallanka argagixisada ee waddanka Kenya, arrintaan ayaa Kenya ka caawin doonta inay sii waddo dadaalkeedii ay magangalyada ku siinaysay qaxootiga. Kaalmadaan ayaa ka caawin doonta qaxootiga waxarashada, caafimaadka, guryaha iyo biyo nadiif ah oo ay helaan.
