Dalka Rwanda oo jaaliyadda Soomaaliyeed ay ku shirayeen ayaa saakay ka qeyb galayaasha shirkaasi oo ah kaalinta qurba joogta Soomaaliyeed ay ku yeelan karaan dib u dhiska iyo maalgashiga Soomaaliya waxa ay booqanayaan xaruumaha qadiimiga ah ee dalkaasi islamarkaana taariikhiga ah oo la dhigey xusuustii xasuuqii Rwanda 1994 si ay indhaheeda ugu soo arkaan dhibaatada Rwanda ka dhacday iyo sida hadda looga gudbey, iyada laga qaadanayo casharo laga yaabo in xal loogu heli karo arrimaha Soomaaliya ka taagan oo siyaaabo badan ula mid ah wixii ka dhacay Rwanda.
Goobaha ay booqanayaan dadkaasi ayaa waxa ka mid ah meelihii ku bur buray dagaaladii sokeeye ee ka dhacay dalka Rwanda oo ku yaala magaalada Kigali sida xaruun lagu xanaaneeyo dadkii ku naafoobay dagaaladii ka dhacay 1994-tii xiligaasi oo uu xasuuq ba’an ka dhacay.
Ka qeyb galayaasha shirkaasi ayaa aad ula dhacay bilicda, quruxda magaalada Kigali ee dalkaasi, iyo is jeceylka dadka reer Ruwaanda, taasi oo ah mid laga baran karo cashar maadaama dalkaasi uu soo maray colaado dad badan ay ku dhinteen.
