Bulsho walba oo dunida saaran waxa ay ku tiirsan tahay dhallinyaradeeda oo ah cududda lagu dhiso dalalka, kana qeyb qaata horumarka dalka dhinac kasta oo uu ahaado.
Dhallinyarada ayaa ah meshiinka dhaqaajiya bulshooyinka, waana hoggaamiyayaasha mustaqbalka.
In ka badan 60 % dadka Soomaalidu waa dhallinyaro, waxaase nasiib darro ah in da’ yartaasi aysan helin daryeelkii ay mudnaayeen, aanna sidii habbooneyd looga faa’iideysan awoodaha ku keydsan,sababo ay ugu wayntahay colaadihii daba dheeraaday ee dalka soo maray.
Markii ay dhallinteennu waayeen daryeel, waxbarasho iyo fursado shaqo, waxay baylah u noqdeen dagaal oogayaal beeleed iyo kuwo diineed oo dhallinyarada ka dhigtay xaabo ay dagaallada ku huriyaan.
Hadda oo ay soo laabaneyso dowladnimadii ayna sii shiiqayaan dagaalladii qabiilka iyo xag-jirnimada salka ku hayay, maxaa la gudboon dhallinyarada Soomaaliyeed, kaalin ceynkee ah ayayse bulshada ku leeyihiin?
Waa mowduuca aan kaga hadleyno Barnaamijkeenna Tubta Toosan oo uu marti noogu yahay Sheik Cumar Wardheere oo ka mid ah culimada Soomaaliyeed.
