War ka soo baxay howlgalka Mareykanka ee qaaradda Afrika ee AFRICOM ayaa sheegay in ayagoo kaashanaya ciidanka xoogga dalka Soomaaliyeed in ay fuliyeen weerar dhanka cirka ah oo lagu qaaday maleeshiyaad ka tirsan Alshabaab oo ku sugnaa deegaanka Araare ee gobolka Jubada hoose.
Weerarka oo dhacay sadexdii bishan ayaa lagu diley afar kamid ah maleeshiyaadka Alshabaab, waxaana ay xuseen in aysan jirin khasaare soo gaaray shacabka ku nool goobka uu ka dhacay weerarka.
Duqeynta lagu beegsaday Alshabaab ayaa ka dambeeyay markii sida la sheegay dhaq dhaqaaq ay ka dareemeen deegaanka xilli ciidanka xoogga dalka Soomaaliya halkaas ay ka wadeen roondo.
Warka ayaa sidoo kale, lagu xusay in Mareykanka uu sii wadi doonaan dhammaan talaabooyinka lagu difaacayo muwaadiniinta Mareykanka isla markaana awoodooda lagu wiiqayo Alshabaab, iyadoo lala shaqeynayo AMISOM, ciidanka xoogga dalka Soomaliya iyo howlgalada la dagaalanka argagaxisada.
