Kooxda Daacish ayaa sheegtay mas’uuiyada weerar lagu qaaday Ciidamo Ciraaqiyiin ah oo ku sugnaa Gobolka Anbar ee dalkaasi.
War qoraal ah oo ka soo baxay Kooxda ISIL,ayaa lagu sheegay in ugu yaraan 7-Askari oo ka tirsan Ciidamada Dowladda Ciraaq lagu dilay weeraro is xig xigay oo lagu qaaday Gobolka Anbar halka 16-kale la dhaawacay.
Weerarka oo dhacay shalay gelinkii danbe ayaa lala bartilmaameedsaday xarumo dhowr ah oo ay ciidamada Ciraaq kaga sugnaayeen Gobolka Anbar oo ku yaalo Galbeed magaalada Caasimada ah ee Baqdaad.
Dowladda Ciraaq ayaa ciidamo cusub ku xoojisay goobaha la weeraray oo u dhow magaalada Ramaadi,waxayna Kooxda Daacish marka hore weerar ismiidaamin ah ku qaadeen xarunta Ciidamada, ka dibna goobta laga maqlay rasaas xooggan oo muddo kooban socotay.
Kooxda Daacisha ayaa magaalada Ramaadi laga saaray horaantii sanadkii 2015-kii,balse waxaa sii socday wixii intaasi ka danbeeyay weerarada ku dhifoo ka dhaqaaq ah ay ku qaadayeen Gobolka Anbar.
Weerarada ayaa daba socda,guulo is daba joog ah oo maalmihii la soo dhaafay ay gaarayeen Ciidamada Ciraaq,sida lagu sheegay War ka soo baxay Dowladda Ciraaq.
Horaantii bishan ayay ahayd markii Kooxda Daacish ay dishay ugu yaraan 60-Qof halka dhaawac uu soo gaaray toboneeyo kale ka dib weeraro mataano ah ay ku qaadeen magaalada Nasiriyah oo ku taalo Koonfurta Ciraaq.
