Kooxda Chelsea ayaa ka hartay koobka Champions League-ga,ka dib markii lugtii labaad garoonkeeda Stamford Bridge ay barbardhac 2-2 ah kula badisay kooxda Paris Saint Germain oo u soo baxday quarter finalka koobka Champions League-ga.
Garsoorihii ciyaarta Bjoern Kuipers ayaa daqiiqadii 32-aad ee ciyaara rooso muran dhalisay u taagay Ciyaaryahan Zlatan Ibrahimovic oo weerarka uga ciyaara kooxda Paris Saint Germain.
Ciyaaryahan Gary Cahill ayaa daqiiqadii 81-aad ee ciyaarta goolka koowaad u dhaliyay kooxda Chelsea.
Ciyaaryahan David Luiz ayaa daqiiqadii 86-aad ee ciyaarta goolka bareejada u dhaliyay kooxda Paris Saint Germain,waxana ay ciyaarta noqotay bareejo 2-2 ah isku celcelis ahaan,ka dib markii ay labada kooxood lugtii hore ku soo kala baxeen barbardhac 1-1 ah,waxaana ciyaarta lagu daray 30-daqiiqo oo dheeraad ah.
Ciyaaryahan David Luiz oo horey ugu ciyaari jiray kooxda Chelsea ayaa ku hor dabaal degay taageerayaasha kooxdiisii hore.
Ciyaaryahan Thiago Silva ayaa bilowgii waqtigii dheeriga ahaa ee ciyaarta lagu daray gacanta ku taabtay kubadda gudaha xariijinta 18-ka,waxaana rigooradii loo dhigay gool u bedelay oo ciyaarta 2-1 ka dhigay Ciyaaryahan Eden Hazard.
Ciyaaryahan Thiago Silva ayaa dhaamadkii waqtigii dheeriga ahaa ee ciyaarta goolka labaad ee bareejada oo kooxdiisa Paris Saint Germain u suura galiyay u soo bixitaanka quarter finalka koobka Champions League-ga u dhaliyay kooxdiisa.
Ciyaarta ayaa ku dhamaatay bareejo 2-2 ah,taasi oo micnaheeda ay tahay in kooxda Chelsea ay ku hartay labada gool ee looga dhaliyay garoonkeeda Stamford Bridge.
Kooxda Paris Saint Germain ayaa isku celcelis ahaan 3-3 ugu soo baxday quarter finalka koobka Champions League-ga.
