Kooxaha San Lorenzo iyo Auckland City ayaa ciyaartii labaad ee Semi-finalka koobka naadiyada aduunka ee Fifa Club World Cup ku wada ciyaaray garoonka Le Grand Stade de Marrakech ee dalka Morocco.
Kooxda San Lorenzo ayaa goolka la hor martay,waxaana dhamaadkii qeybtii hore ee ciyaarta u dhaliyay ciyaaryahan Pablo Barrientos,sidasi ayaana lagu kala nastay qeybtii hore ee ciyaarta.
Markii la isku soo laabtay qeybtii labaad ee ciyaarta ayaa waxaa daqiiqadii 67-aad ee ciyaarta goolka barbardhaca u dhaliyay kooxda Auckland City ciyaaryahan Angel Berlanga,sidasi ayeyna ku dhamaatay ciyaarta,waxaana lagu daray 30-daqiiqo oo dheeraad ah.
Ciyaaryahan Mauro Matos ayaa bilowgii waqtigii dheeriga ahaa ee lagu daray ciyaarta goolka labaad ee guusha u dhaliyay kooxda San Lorenzo.
Kooxda San Lorenzo ee dalka Argentina ayaa sabtida Finalka koobka naadiyada aduunka la Ciyaari doonto kooxda Real Madrid oo xalay 4-0 uga badisay kooxda Cruz Azul ee dalka Mexico.
