Mudane Maxamed Sheekh Cismaan Jawaari oo ah ku simaha Madaxweynaha dalka ahna Guddoomiyaha Golaha Shacabka Jamhuuriyadda Federaalka Soomaaliya ayaa ka tacsiyadeeyey geerida ku timid Allaha u naxariistee Guddoomihii hore ee Baarlamaanka Marxuum Jaamac C/laahi Qaalib oo ku geeriyooday magaalada Lusaka ee caasimadda dalka Zambia.
“INAA LILAAHI WA INAA ILEEYHI RAAJICUUN, hor iyo horaan aniga oo ku hadlaya magaceyga, magaca Magaca Madaxweynaha Jamhuuriyadda,magaca Guddoonka Golaha Shacabka iyo magaca Xildhibaannada Baarlamaanka waxaan ka tacsiyadeynayaa geerida naxdinta leh ee ku timid marxuum Jaamac C/laahi Qaalib oo ahaa Guddoomiyihii Baarlamaanka Soomaaliya intii u dhaxeysay 1960kii-1964kii, waxaan Alle uga baryayaa naxariistiisa jano in uu siiyo” ayuu yiri Ku simaha Madaxweynaha Dalka ahna Guddoomiyaha Baarlamaanka.
Allaha u naxariistee marxuum Jaamac C/laahi Qaalib waxa uu ku dhashay xaafada Jaamac Weyn ee magaalada Hargeysa sanadka markuu ahaa 1930kii waxaana uu xifdinta qur’aanka kariimka ku bartay malcamada qur’aanka ee Sheekh Haaruun, kadib waxa uu waxbarasho usii aaday magaalada Cadan ee dalka Yemen halkaasi oo uu uga sii gudbay dalka Ingiriiska waxaana uu dalka Soomaaliya dib ugu soo laabtay sanadka markuu ahaa 1956kii xiligaasi oo uu ka qeyb qaatay halkii xornimo doonka.
Dhanka siyaasadda waxa uu xubin fir fircoon ka ahaa xisbigii SNL oo ka dhisnaa gobollada Waqooyi ee Soomaaliya, doorashadii 1960kii uu ku noqday xubin Baarlamaan waxaa laga soo doortay magaalada Sallaxleey ee gobolka Togdheer waxaana loo doortay Guddoomiyaha Baarlamaanka Soomaaliya 30kii Juun 1960kii ayadoo Baarlamaankaasina uu ka koobnaa 123 Xildhibaan, xalay ayuuna ku geeriyooday magaalada Lusaka ee wadanka Zambia.
INAA LILAAHI WA INAA ILEEYHI RAAJICUUN
