Iyadoo deegaanada dhaca dhinaca waqooyi bari ee maamul goboleedka Soomaaliyeed ee Galmudug ay ka socdaan dagaalo u dhaxeeya ciidanka xooga dalka Soomaaliyeed iyo kuwa Galmudug oo isku dhinaca ah iyo maleeshiyaad ka tirsan kooxda Alshabaab ayaa maanta magaalada Gaalkacyo waxaa lagu qabtay kulan amiga looga hadlayay.
Kulanka ayaa waxaa ka qeybgalay madaxweynaha dowlad goboleedka Galmudug, xubo ka tirsan wasiirada maamulkiisa, xildhibaano ka tirsan Galmudug,mas’uuliyiinta maamulka gobolka iyo qaar kamid ah bulshada ku dhaqan magaaladaasi.
Guddoomiyaha gobolka Mudug,C/rashiid Xaanshi Cartan, waxaa uu kulanka ka sheegay diyaar u yihiin in ay ka hortaggaan kooxda Al-shabaab isla markaana qeyb ka qaadan doonaan gulufka ka dhanka ah maleeshiyaadka Alshabaab.
Madaxweynaha dowlad goboleedka Soomaaliyeed ee Galmudug C/kariim Xuseen Guuleed, ayaa balan qaaday in ka maamul ahaan ay ka go’an tahay dagaalka ka lagula jiro Alshabaab, isagoo shacabka ka codsaday in ay qeyb ka qaataan dagaalka Al-shabaab isla markaana lagama maarmaan ay tahay in shacabka ay la shaqeeyaan ciidanka amniga si looga adkaado kooxda qaswadiyaasha ah ee Al-shaab.
Dhinaca kale wararka ka imaanaya deegaanka Af-barwaaqo oo ka tirsan gobolka Mudug isla markaana qiyaastii 260 KM u jira magaalada Gaalkacyo ayaa sheegaya in dagaal maanta uu ka qarxay kaas oo u dhaxeeya ciidanka xooga dalka Soomaaliyeed iyo kuwa Galmudug oo isku dhinaca ah iyo Al-shabaab.
Deegaanada dagaalka uu ka socodo ayaa lagu soo waramayaa in ay isgaarsiinta hawada ka maqan tahay isla markaana aan la ogeyn khasaaraha uu geystay dagaalka.
Saraakiisha ciidanka Galmudug ayaa sheegay in maleeshiyaadka ciidanka Galmudug kula dagaalamaya deegaanadan ay kamid ahaayeen kuwii ka soo cararay deegaanada Puntland oo dhowaan duulaan ay ku qaateen kooxda Al-shabaab, hase yeeshee ciidanka Puntland ay ka soo saareen deegaanadii kolkii hore ay weerareen.
