Kulankani oo looga hadlayey dardar gelinta howlaha dib u eegista dastuurka KMG ah ee Soomaaliya ayaa lagu qabtay xarunta Villa Hargeysa ee magalaada Muqdisho, waxaana ka qeyb galay Guddoomiyaha baarlamaanka Soomaaliya , Guddiga kormeerka arrimaha dastuurka ee u qaabilsan Baarlamaanka dalka, Guddiga Madaxa banaan ee dib u eegista dastuurka, wakiillo ka socday hey’addaha deeq bixiyaasha caalamka, iyo xubno ka socday xafiisyada Madaxweynaha iyo Ra’isul wasaaraha Soomaaliya.
Kulanka oo uu shir guddoominayey Afhayeenka Golaha shacabka Mudane Maxamed Sheekh Cismaan Jawaari ayaa u jeedadiisu aheyd sidi la’ isaga xogwareysan lahaa waxyaabihi ka qabsoomay arrimihii looga hadlay kulankii kan ka horeeyey ee qabsoomay bishii September ee sanadkani.
Ka qeyb galayaasha kulanka ayaa isku dhaafsaday fikrada la xariira qaabka ugu wanaagsan ee dib u eegista dastuurka KMG ah loogu guuleysan karo waqtiga loogu talo galay, iyadoo ugu dambeyntiina la isku raacay in la dhiso Guddi howleed KMG ah oo ka kooban labada guddi ee ay qusayso Arrimaha dastuurka.
Hab-dhowraha barlamaanka Soomaaliya mudane Maxamed Cumar oo warbaahinta Qaranka la hadlay kulanka kadib ayaa sharaxay kulankii maanta waxa looga hadlay iyo shaqada guddigani KMG ah.
“Guddigaan shaqadiisu waxa ay tahay, waa guddi howleed fududeyn doona howlaha dib u eegista dastuurka oo loo kala qaaday sedex qeybood oo kala ah qeyb u baahan bedel, mid u baahan farsamo, iyo mid u baahan in laga wada hadlo arrimaha quseeya siyaasada, waxayna talooyin ka soo uruurin doonaan dhamaan qeybaha kale duwan ee bulshada, waxayna dib ugu soo celin doonaan kulankii maanta midka xiga” Ayuu Yiri Xildhibaan Maxamed Cumar.
Dib u eegista dastuurka ayaa ah tiir ka mid ah hir galinta hiigsiga 2016-ka, waxaana loo qorsheeyey in lagu soo afmeero howlaha dib habeynta dastuurka sanadkani 2015-ka, islamarkaana afti dadweyne lagaliyo ugu dambeyn bisha March sanadka 2016-ka, kulankani maanta waa mid qabsooma 2-dii todobaadba mar.
Sawir Qaade: Farxaan Suleymaan Maasgaro
