Kulankan oo ahaa mid looga hadlayay sidii loo horumarin lahaa adeegyada bulshada ee magaalada Gaalkacyo isla markaana wax looga qaban lahaa caqabadaha maamulka ka heysta hirgelinta arintan ayaa waxaa ka soo qeybgalay madaxweynaha Galmudug mudane C/kariin Xuseen Guuleed oo ay wehliyaan qaar ka mida xubnaha Golaha Wasiirada Galmudug ay la qaataan Xubnaha Golaha deegaanka Maamulka Dagmada Galkacyo ee Dowlad Gobaleedka Galmudug iyo qeybaha kala duwan bulshada ku nool afarta xaafadood ee magaalada.
Kulanka ayaa ugu horeeyn waxaa ka hadlay duqa dagmada Gaalkacyo Xirsi Yuusuf Barre,waxaana uu sheegay inay jiraan baahiyo fara badan oo dhanka adeegyada bulshada una baahan in la horumariyo.
Kulanka ayaa intii uu socday waxaa ka hadlay xubno ka tirsan golaha deegaanka dagmada Gaalkacyo ee Galmudug iyo qaar ka mid ah bulshadii kulanka ka qeyb gashay kuwaasi oo ay ugu horeeyaan ururada dhalinyarada iyo haweenka kuwaasi oo sheegay in ay markasta diyaaar u yihiin in ay gacan ka geystaan sare u qaadista iyo horumarinta adeegyada ay u baahan yihiin bulshada magaalada Gaalkacyo ee xarunta gobalka Mudug.
Madaxweyne Guuleed, oo isna gunaanadkii kulanka ka hadlay ayaa sheegay in Maamulka dagmada Gaalkacyo iyo shacabkiisa degan laga rabo inta badan wax ka qabashada dhibaatooyinka ka jira dhanka adeegyada bulshada, isagoo sheegay in maamulka looga fadhiyo wax ka qabashada dhibaatada laga dhawaajiyay.
W/D: C/risaaq Maxamed Axmed, Gaalkacyo wakiilka warbaahinta Qaranka ee
Gobalka mudug
