Kulankaan looga hadlayay sidii laysaga kaashan lahaa ka hortagga iyo la dagaalanka argagixisada al shabaab ayaa
maanta lagu qabtay magaalada Galkacyo iyadoo ay ka qeyb galeen mas’uuliyiin ka tirsan labada gole ee maamulka Galmudug oo uu horkacayay madaxweynaha Galmudug .
Gudoomiyaha gobalka Mudug ee Galmudug C/rashiid Xaashi Cartan oo kulanka ka hadlay ayaa sheegay in shacabka iyo
maamulka gobalka ay ka go’an tahay in ay iska kaashadaan amaanka gobalka iyo la dagaalanka argagixisada Al shabaab .
“Mudane madaxweyne hadaan nahay shacabka iyo maamulka gobalka Mudug waxaan mar kasta diyaar u nahay in aan ka wada shaqeeyno adkeeynta amaanka sidoo kalana aan dhinac uga soo wada jeesano cid kasta oo khatar ku ah amaanka Gobalka ” ayuu yiri gudoomiyaha gobolka Mudug ee maamulka Galmudug.
Kulanka ayaa intii u socday waxaa ka hadlay xubno ka tirsan golaha wasiirada iyo baarlamaanka Galmudug kuwaasi oo sheegay in loo baahan yahay in ciidamada laga tageero wax kasta oo ay u baahan yihiin ilaa iyo inta deeganada Galmudug laga xoreeynayo meelaha yare e ay uga sugan yihiin kooxda arxan laawayaashaa ee Al shabaab.
Madaxweynaha Galmudug C/kariin Xuseen Guuleed ayaa sheegay in maamulka uu hogaamiyo ay ka go’antahay ineey xididada u siibaan haraadiga maleeshiyaadka Al shabaab ee ku dhuumaaleeysanaya deegaanada Galmudug isagoo dhanka kalana ugu baaqay shacabka Galmudug in ay la shaqeeyaan laamaha amaanka ayna kusoo wargaliyaan cid kasta
oo ay ku tuhmaan in uu xiriir la leeyahay maleeshiyaadka Al shabaab
“Sida aad la socataan waxaa haatan socda howlgalo lagaga hortagayo argagixisada Al shabaab marka waxaan ugu horeeyn idinkaga mahad celinayaa bulshada Mudug sida aad markasta ula shaqeeysaan maamulka isla markaana aad uga gacan siisaan ciidamada sugida amaanka maanta waxaa laydinka rabaa inaad sii laba laabtaan dadaalkiina” ayuu yiri
madaxweyne Guuleed
Kulanka maanta ayaa ku soo aadayaa iyadoo deegaano ku yaala dhinaca bariga Gobalka Mudug dagaalo ay ku dhaxmareen Ciidamada Galmudug iyo Maleeshiyaad ka tirsan kuwa Al shabaab oo mudooyinkaanba ku dhuumaaleeysanayay meelo ka mida deegaanada Puntland iyo Galmudug.
Sawir Qaade C/risaaq Maxamed Axmed Galkacyo
