Mashruuca Nagaad oo ah mashruuc balaaran isla markaana hadafka laga leeyahay uu yahay horumarinta magaalooyinka iyo xoojinta awoodda dowladaha Hoose ee bixinta adeegyada iyo dhismaha kaabayaasha dhaqaalaha dalka, Isla-markaana laga fuliyo magaalooyinka Muqdisho, Garoowe, Kismaayo, Baydhabo, Dhuusamareeb iyo Beladweyne ayaa lagu soo gabagabeeyay magaalada Nairobi ee dalka Kenya.
Guddoomiye Ku-xigeenka Amniga iyo Siyaasadda Gobolka Banaadir Mudane Maxamed Axmed Diiriye Yabooh, oo ay qeyb ka abaayeen Maayarada magaalooyinka, Dhuusamareeb, Garoowe, Kismaayo iyo Baydhabo ayaa madasha ka qeybgalay.
Maayarada Kismaayo iyo Dhuusamareeb ayaa sheegay in mashruuca Nagaad uu wax badan ka hirgalay haatana ay socdaan howlaha la xiriira dib u dhiska waddooyinka iyo kaabayaasha dhaqaalaha.
Aamino Caraale oo ka tirsan mashruuca Nagaad ee Wasaaradda Howlaha Guud iyo Guriyeynta ee Xukuumadda Federaalka Soomaaliya ayaa xustay in shirka uu guul ku soo dhamaaday, ujeedkuna uu yahay Qiimeynta waxyaabaha ka qabsoomay afartii sano ee la soo dhaafay Iyo qorshaha fulinta howlaha mashruuca saddexda sano ee soo socota.
Guddoomiye Ku-xigeenka Amniga iyo Siyaasadda Gobolka Banaadir Mudane Maxamed Axmed Diiriye Yab ayaa tilmaamay in Maamulka uu wax badan ka faaiidi doono mashruucan, haatana lagu guulaystay in dib loo furi meelo biyo mareenada ahaa oo burburkii dalka ku xirmay.
Guddoomiye Yabooh “Burburkii dalka kadib waxaa xirmay meelihii biya mareenada Caasimadda balse waxaa lagu guulaystay in waro badan la hirgeliyay oo ay biyaha maraan kuwaas oo loo sameeyey xeendaab dadka iyo xoolaha looga celiyo”.
