Kulankan oo diiradda lagu saarey xoojinta amniga magaalada Dhuusamareeb ee xarunta Galmudug, isla markaana lagu meel dhigay qodobo lagu xoojinayo nabadgalyada xiliga doorashada ayay ka wada qayb galeen Saraakiisha Talisyada Booliiska iyo Nabadsugida Dhuusamareeb, gudiyada xaafadaha iyo madaxda maamulka Caasimadda.
Fadhigan oo ku soo beegmay xili ay socdaan dadaallada lagu sii xaqiijinayo amniga doorashooyinka dhawaan bilaabmaya ee Federaalka ayaa laga soo saarey amaro lagu adkeynayo dhaqdhaqaaqa dadka soo galaya magaalada Dhuusamareeb, kuwaa oo la farey in ay tagaan xafiiska hubinta dadwaynaha, kaasi oo bixinaya ogolaanshaha guriyaha ijaarka ah kadib markii laamaha amnigu ay baaraan xogta kireystaha doonaya in uu ku nagaado magaalada.
Guddoomiyaha Dhuusamareeb Macalin Cabdiraxmaan Geedaqoroow oo ka warbixiyay qodobada kulankan ka soo baxay ayaa sheegay in shirkan uu daba-joogo shaqo mudooyinkanba ay wadajir u wadeen laamaha amniga iyo maamulka caasimadda oo lagu diiwaan galinayay goobaha dadwaynuhu ku kulmo iyo ganacsiyada waaweyn.
