Kulan looga soo horjeedo mooshinkii dhawaan Xildhibaanno ka tirsan Baarlamanka Soomaaliya ay ka gudbiyeen Madaxweynaha Jmahuuriyada Soomaliya ayaa maanta lagu qabtay magaalada Muqdisho.
Kulanka lagu taageerayay Madaxweynaha Jamhuuriyadda Federaalka ah ee Soomaaliya Mudane Xasan Sheekh Maxamuud, isla markaana looga soo horjeeday mooshinka ka dhan ah Madaxweynaha ayaa waxaa ka qeyb galay xubno ka tirsan maamulka Gobolka Banaadir, qeybaha bulshada, faniin iyo mas’uuliyiin kale, kaasi oo lagu qabtay xarunta degmada Shangaani ee Gobolka Banaadir.
Qaar ka mid ah ka qeyb galayaasha kulanka ayaa sheegay in xilligan hay’adaha dowladda looga fadhiyo sidii ay uga qeyb qaadan lahaayeen samata bixinta bulshada Soomaaliyeed, oo aan loo baahneyn in xilligan laga shaqeeyo dib u dhac ku yimaada horumarka la hiigsanayo.
Axmed Xasan Yalaxow Guddoomiyaha degmada Shangaani oo isna kulanka hadal kooban ka jeediyay ayaa tilmaamay in shacabka degmada ay yihiin dad jecel nabadda iyo dowladnimada, waxaana uu ku baaqay in loo istaago ka shaqeynta horumarka dalka.
Guddoomiye ku-xigeenka goboka Banaadir ee dhanka siyaasadda Mudane Maxamed Axmed Diiriye ayaa sheegay in shacabka looga baahanyahay inay gacmaha isqabsadaan oo ay la shaqeeyaan hay’adaha amniga.
“Xildhibaannadu waa Xilhdibaanno Qaran, waa Xildhibaanadeenii, inay shaqeeyaan xaq ayay u leeyihiin, laakiin waqtiga maanta la marayo iyo waaqaca jira iyada oo la fiiranayo, Qaranka in loo hiiliyo, oo loogu hiiliyo in Qaranku uu horumar oo la wada shaqeeyo, oo horay loo socda, waa wax muhiim ah oo meesha ku jira, dabcan waxaan is leeyahay ma kala go’i karno, waqtiga aan ku jirno waa waqti xaasaasi ah oo u baahan in si wada jir ah looga gudbo” ayuu yiri Guddoomiye ku-xigeenka Siyaasadda gobolka Banaadir.
