Liiska sedaxda ciyaaryahan ee isugu soo hartay abaal marinta ciyaaryahanka ugu wanaagsan aduunka ee FIFA Ballon d’Or ee sanadka 2015-ka oo lagu dhawaaqay.
Seaxdan ciyaaryahan ayaa waxaa ka mid ah labada ciyaaryahan ee horey u soo guuleystay abaal marintan oo kala ah Cristiano Ronaldo iyo Lionel Messi,waxaana ku wehliyo gool haye Manuel Neuer oo u ciyaara xulka Germany iyo kooxda Bayern Munich.
Ciyaaryahan Lionel Messi oo 27-jir ah ayaa afar mar horey u soo guuleystay abaal marintan intii u dhaxeysay sanadihii 2009 ilaa 2012.
Ciyaaryahan Cristiano Ronaldo oo 29-jir ah ayaa isna labo mar horey u soo guuleystay abaal marinta,waana sanadihii 2008 iyo 2013.
Gool hayaha xulka Germany Manuel Neuer oo 28-jir ah ayaa xulkiisa kula guuleystay koobkii aduunka ee bartamihii sanadkan lagu qabtay dalka Brazil.
Ciyaaryahanka ku guuleysta abaal marintan FIFA Ballon d’Or ayaa waxaa looga dhawaaqi doonaa xaflad 12-bisha January ee sanadka 2015 lagu qaban doono magaalada Zurich.
