Garoonka diyaaradaha degmada Hobyo ee gobolka Mudug oo aan muddo dheer la isticmaalin ayaa hadda waxaa lagu dhisayaa mashruuc maamulka degmadu fulinayo uuna maalgalinayo Santuuqa xasilinta Soomaaliya (SSF Somali Stability Fund).
Mashruucan oo ah tabar wadaag ayaa bulshada laga doonayaa in 20% ay bixiso qarashka dhismaha, balse maamulka degmada Hobyo ayaa sheegay in degmadu maadaama aysan lahayn nidaam dhaqaale iyo canshuur aysan bixin karin dhaqaalahaas, sidaa darteedna ay u baahanyihiin taageero.
Xildhibaan Cabdi Xasan Cilmi oo ka tirsan Baarlamanka Galmudug ayaa ugu baaqay bulshada Soomaaliyeed inay ka qayb qaataan dhismaha garoonka diyaaradaha degmada Hobyo.
Gudoomiyaha degmada Hobyo C/llahi Axmed Cali Faat ayaa sheegay in dhismaha Airporku uu yahay mid muhiim ah, sidaa darteedna ay haboontahay in loo wada istaago.
Degmada Hobyo oo ah magaalo facwayn ayaa hadda u muuqata mid ka soo kabanaysa xilli burbur ah oo ay muddo ku jirtay, waxaana hadda ka soconaya mashaariic yaryar oo maamulka degmadu fulinayo.
