Guddoomiye Ku-xigeenka Maamulka iyo Maaliyadda Gobolka Banaadir Mudane Ciise Maxamuud Guure oo uu wehliyo Garyaqaanka Guud ee Maamulka Gobolka Banaadir Mudane Muxiyadiin Xasan Maxamed iyo La-taliye sare Iimaan Nuur Iikar ayaa booqasho shaqo ku tagay Machadka Tababarada Maareynta Dhaqaalaha iyo Dowlad Wanaaga ee hoostaga Wasaaradda Maaliyadda Dowladda Federaalka Soomaaliya.
Madaxda Gobolka Banaadir ayaa kulan la qaatay Agaasimaha Machadka Mudane Cumar Jaamac, taasi oo loogu wada hadlay Wada-shaqeynta Maamulka Gobolka Banaadir iyo Machadka, Horumarinta iyo kobcinta aqoonta shaqaalaha Dowladda Hoose, maadaama mar dhow Gobolka laga dhaqan galin doonno nidaamka PFM-System, Iyadoo khubarro dhinaca Maaliyadda ah ay ku howllan yihiin qiimeyn lagu qeexi doono kartida hey’adeed ee Gobolka Banaadir iyo ifinta caqabadaha gaabiska u keeni kara gudashada waajibaadka maaliyadeed.
Ugu danbeyntii Maamulka Gobolka Banaadir iyo Machadka Tababarada Maareynta Dhaqaalaha iyo Dowlad wanaaga ayaa isla gartay in la xoojiyo wada-shaqeynta labada dhinac, si la isaga kaashado qorshaha ku saleysan daah-furnaanta Maaliyadeed oo uu Maamulka Gobolka Banaadir doonayo in uu ugu shaqeeyo Bulshada Caasimadda.
