Gudoomiye ku xigeenka Gobolka Banaadir ee dhanka Siyaasada Maxamed Axmed Diiriye oo hawlo shaqo u jooga Degmada Cadaado ayaa Maanta booqday meelo badan oo kamid ah degmada sida Isbitaalka weyn ee Degmada Cadaado Garoonka Kubada Cagta Suuqa weyn ee Ganacsiga iyo Xarunta Degmada wuxuuna balan qaad u sameeyey Isbitaalka Degmada Cadaado.
Kadib markii Agaasimaha Isbitaalka Degamada Cadaado Maxamed Cali Yuusuf uu warbixin ka siiyey Gudoomiye ku xigeenka Maamulka Gobolka Banaadir ee dhinaca Siyaasadda Maxamed Axmed Diiriye baahida ugu weyn ee haysata Isbitaalka ayaa Maxamed “Yabooh” wuxuu ballan qaaday in isaga oo ku hadalaya Magaca Maamulka Gobolka Banaadir uu fulin doono baahida ay usoo bandhigeen Maamulka Isbitaalka Cadaado, kaas oo ahaa in ay helaan Bangiga Dhiigga oo ay san haysan iyo Nalalka Waa weyn ee qalliinka lagu sameeyo.
Dhinaca kale Isbitaalka Degamada Cadaado ayaa Maanta la soo gaarsiiyey ilaa 30 qofood oo gaari kula gaddoomay inta u dhaxaysa Cadaado iyo Gelinsoor kuwaasoo qabay dhaawacyo kala duwan, waxaana Guddoomye Ku xigeenka Gobolka Banaadir uu indhihiisa ku arkay shaqada baahsan ee ka socota Isbitaalka,
oo ay jiifaan ilaa 50 qofood, iyadoo maalin walbana ay bukaan ahaan u yimaadaan ilaa 60 qofood.
Guddoomiye ku xigeenka gobolka Banaadir ee dhinaca Siyaasadda ayaa ugu dambayn ugu baaqay dadka kasoo jeeda degmada Cadaado in ay caawiyaan Isbitaalka oo shaqo wanaagsan u haya bulashada deeganadaas ku nool.
