Guddoomiyaha Gobolka Banaadir ahna duqa magaalada Muqdisho Mudane Xasan Maxamed Xuseen (Muungaab) ayaa maanta shir la qaatay guddoomiyeyaasha degmooyinka, kaasi oo looga hadlayay arrimo badan oo ay ka midtahay horumarinta isdhexgalka bulshada, amniga, Nadaafadda, bixinta canshuuraha guriga iyo dar dargelinta ololaha nadaafadda.
Shirka oo lagu qabtay xarunta dowladda Hoose ee Xamar ayaa waxaa kaloo looga hadlay sidii maamulada degmooyinka iyo laamaha amniga ay isaga kaashan lahaayeen xoojinta nabadgelyada, shacabkana lagu baraarujin lahaa xoojinta la shaqeynta hay’adaha amniga.
Afhayeenka Maamulka Gobalka Banaadir Cabdifataax Cumar Xalane ayaa Warbaahinta u sheegay in shirka looga hadlay shan qodob oo muhiim ah, isla markaana guddoomiyaha uu madaxda maamulada degmooyinka kula dar daarmay inay dar dargeliyaan la shaqeynta shacabka iyo ciidamada amniga, si looga hortago falalka ay maleegayaan kooxda Al-Shabaab.
