Maamulka degmada Hobyo ee gobolka Mudug ayaa ka warbixiyay howlgal ay ciidamada badda ee maamulka Galmudug ย ku soo qabteen Dooni shisheeye oo si sharci darro ah uga kalluumeysanayay xaabeha ku dhow degmadaasi.
Gudoomiyaha degmada Hobyo Maxamuud Maxamed Cawaale oo la soo xiriiray Radio Muqdisho ayaa sheegay in hadda ay gacanta ku hayaan Dooni laga leeyahay dalka Iran, taasoo si sharci darro ah uga kalluumeysaneysay xeebaha Soomaaliya, sida uu hadalka u dhigay.
Wuxuu intaa ku daray in Doonidani ay habeen ka hor gacanta ku soo dhigeen ciidamada ilaalada xeebaha ee maamulka Galgudug, xilli ay si sharci darro ah uga kalluumeysaneysay xeebaha deegaanka Hobyo.
Gudoomiyaha oo hadalkiisa sii wata ayaa intaasi ku daray in ciidamada soo qabtay Doonidani uu dhawaan tababar ugu soo dhamaaday dalka jabuuti,islamarkaana ay howlgallo ka wadaan xeebaha deegaanka Hobyo.
Sidoo kale gudoomiyaha degmada Hobyo ayaa xusay in Doonidaasi iyo shaqaalihii saarnaaba ay bed qabaan, wuxuuna u mahadceliyay ciidamada ilaalada xeebaha ee maamulka Galmudug oo uu sheegay iney ku guuleysteen soo qabashada Doonidaasi.
Gudoomiyaha ayaa tilmaamay in Doonidaasi aysan sidan wax dekominti ah oo u fasaxaya ineey ka kaluumeysato xeebaha dalkeena, isagoo caddeeyay in doonidaasi ay si sharcidarro ah uga kaluumasaneysay biyaha dalkeena Soomaaliya.
