Macalinkii hore ee Kooxda Arsenal Arsene Wenger oo booqasho ku tagay dalka Liberia ayaa waxaa uu soo dhaweyn wanaagsan ka helay qaar ka mid ah shacabka ku nool dalkaasi iyo tageerayaasha Kooxda Arsenal ee dalkaasi Liberia kadib markii uu Casuumad ka helay George Weah Madaxweynaha dalkaasi Liberia oo ahaa Ciyaryahan Ciyaara Kubada Cagta oo Wenger uu geeyay qarada Yurub markisii ugu horeyay kaasi oo magaca uu leeyahay hada ka Sameeyay Dunida oo dhan.
George Weah waxaa uu noqday Ciyaryahanka kaliya ee ka soo jeeda qarada afrika oo ku guuleystay Laacibka Aduunka Sanadkii 1995-kii ayadoo Macalin Wenger uu ka soo iibiyay George Weah Koox ka dhisan gudaha dalka Cameroone Sanadkii 1988-kii xiligaasi oo Macalin Wenger uu Maamulayay Kooxda As Monoco oo ka dhisan dalka Faransiiska.
Macalin Arsene Wenger oo Si heer Sare ah loogu Soo dhaweeyay Garoonka diyaaradaha ee Harbel oo 52km iyo (32 miles) u jira Casimada dalkaasi Liberia Monrovia ayaa waxaa ka mid ahaa Masuuliyiinta soo dhaweysay Wasiirka Dhalinyarada iyo Ciyaaraha dalka Liberia Zoegar Wilson iyo Xubno kale oo ka socday Xirirka Kubada Cagta ee dalkaasi Liberia waxaana dabadeed loo kaxeeyay Casimada dalkaasi Monrovia halkaasi oo Macalin Wenger lagu gudoonsiin doono Bilad Sharafeedka Shaqsiga Sanadka oo Sanad Walba uu bixiyo Madaxweynaha dalka Liberia.
Arsene Wenger oo la hadlay saxafada ayaa u sheegay in uu u yimid George Weah kana Warqabin in la siin doono wax bilad ah.
Macalin Wenger ayaa horey u qirtay in uu xiiseynayo la kulanka Weah mar uu Bbc-da u waramay.
“Waxaan xusuusta markii iigu horeysay ee ku arko kooxda Monoco waxaa uu ahaa mid aad u yar, Ma Jirin cid taqaana ama qiimeyn u haysa ama u maleysay in uu noqon doono Ciyaryahanka ugu wanaagsan dunida, ama uu madaxweyne ka noqon doono dalkiisa,” ayuu yiri Macalin Wenger.
Waxaa uu sii raaciyay. “Nolosha George dhabtii waa Filim. Mid aanan la rumeysan Karin, Waxaa laga sameyn karaa Filim aanan Caadi ahayn.”
Booqashada Macalin Arsene Wenger ee dalka Liberia waxay ahayd mid aysan ku farxin Cid kasta.
Dadka u dhashay dalka Liberia ayaa qaarkood aaminsan Bilad sharafta la sheegay in Wenger la siin doono in ay ka Mudan yahiin Macalin Wenger, Macalimiintii Soo tababartay George Weah inta aysan qaban indhaha Caalamka Sidaasi waxaa Yiri qaar ka mid ah dhageystayaasha Idaacada dalkaasi Liberia Barnamijka Subaxii soo gala ee 50-50 qeybahiisa danbe ee qadka telefanka.
Eugene Nagbe Wasiirka Warfaafinta dalkaasi Liberia oo la hadlayay Bbc-da ayaa sidoo kale sheegay in Bilad Sharafta aanan lagu bixin doonin xirrika ka dhexeeya Weah iyo Wenger balse ay tahay mid laga soo fiirsaday, taasi oo ah in Wenger uu fursado badan siiyay Ciyaartoyda ka Soo baxday qarada afrika.
Macalin Arsene Wenger ayaa Soo tababaray 16 Ciyaryahan oo caan ka ah qarada afrika kuwaasi oo qaarkood uu siiyay fursadihii ugu horeyay oo ay garoon ku galeen.
Ciyaartoyda uu fursadaha siiyay ayaa waxaa ka mid ah Madaxweynaha dalka uu haatan Joogo ee Liberia George Weah kaasi oo uu ka iibsaday Koox ka dhisan dalka Cameroone dabadeedna uu geeyay dalka Faransiiska iyo Kooxda Monoco oo ka dhisan horyaalka dalkaasi, Maamlmo yar kadibna waxaa uu siiyay Wenger Weah fursadii ugu horeysay ee uu garoon ku galo halkaasi oo ay ka soo bilaabatay Sumcadii uu kaga tagay kubada cagta waxaana uu ka gaaray Weah kubada cagta halka ugu sareyso ee uu ka gaaro Ciyaryahan ka soo jeeda qarada afrika ayadoo uu noqday Ciyaryahankii ugu horeyay ee ku guuleysta abaal marinta Laacibka ugu wanaagsan Dunida Sanadkii 1995-kii xiligaasi oo uu ku sugnaa Kooxda Ac Milan oo ka dhisan dalka Talyaaniga.
Wenger Ciyaartoyda uu soo tababaray ee ka soo jeedo qaarada afrika waxaa ka mid ah Difaaci dalka Ivory Coast Kolo Toure, Difaaci dalka Cameroon Lauren iyo Mucjisadii daka Nigeria Nwankwo Kanu dhamaantood waxaa ay u wada Ciyaaren kooxda Arsenal oo tageerayasheeda ay ugu badnayeen dadkii ku soo dhaweeyay gudaha dalkaasi Liberia oo haatan uu booqasho ku Joogo Macalin Arsene Wenger.
