Madaxda dowladda ayaa siyaabo kala duwan uga hadashay weeraradii iyo qaraxyadii ismaadaaminta ahaa ee xalay fiidkii ka dhacay agagaarka beerta nabadda iyo hotel SYL ee ku yaala degamda Xamar weyne ee gobolka Banadir.
Wasiirka Warfaafinta, Hidaha Iyo Dhaqanka Xukuumadda Soomaaliya, mudane Maxamed Cabdi Xayir “Maareeye” oo shir jaraa’id ku qabtay goobta ay ka dheceen weerarada iyo qaraxyadii fashilmay ayaa sheegay in ciidamada ammaanka gaar ahaan kuwa nabad sugidda qaranka ay ka hortageen dhagartii ay kooxaha nabad diidka Al-shabaab ku doonayeen in ay ku gumaadaan shacabkii ku sugnaa hotel SYL iyo beerta nabada, waxa uuna wasiirka cod dheer ku sheegay in qaraxyada iyo weerarada Al-shabaab aysan marnaba waxba ka badali doonid horumarka hana qaaday ee ka hirgalay guud ahaan Soomaaliya gaar ahaan magaalada Muqdisho ee caasimadda Soomaaliya.
Dhanka kale, Wasiirka Amniga Gudaha, C/risaaq Cumar Maxamed oo isana ka hadlay saameynta qaraxa ayaa sheegay in qaraxa uu ahaa mid aad u xoogan oo xaddigiisa (awoodiisa) lagu qiyaasay 200kg, hasayeeshee ilaah uu ka bad baadiyay shacabka Soomaaliyeed eek u sugnaa goobta uu ka dhacay, waxa uuna ciidamada ammaanka ku boogaadiyay sida geesinimada leh ee ay u fashiliyeen dhagarta Al-shabaab ee salka ku heyso gumaadka shacabka Soomaaliyeed ee aanan waxba galabsan.
