Madashan oo uu ka qayb galey Madaxwaynaha Galmudug mudane Axmed Cabdi Kaariye ayaa aheyd soo bandhigida warbixinta sahanka Caafimaadka iyo macluumaadka dadka Dowlad Gobolka Galmudug ee 2020 oo ay wadajir u sameeyeen Wasaaraddaha Qorsheynta iyo Caafimaadka Dowlad Goboleedka Galmudug.
Daraasadan oo lagu soo bandhigey macluumaadka dhabta ah ee la xiriira bulshada ayaa diirada lagu saarey in la ogaado heerarka ay marayaan tusaalayaasha muhiimka ah sida caafimaadka, waxbarashada, fayadhowrka, nafaqada iyo nolosha heerarka kala duwan ee qoysaska Galmudug
Maslax Maxamed Cabdi madaxa kormeerka iyo maareynta qandaraasyada ee Wasaaradda Caafimaadka Galmudug ayaa ka waramay faa’iidada ay leedahay daraasadan.
Wasiirka qorsheynta Galmudug Cabdinaasir Geelle iyo wasiirka Caafimaadka Dr. Cabdiwali Cabdulahi Jaamac ayaa tilmaamey in qiimeyntani meesha ka saari doonto xogihii hore looga xigan jiray ee hey’addaha aan dowliga aheyn.
Madaxwaynaha Galmudug Axmed Cabdi Kaariye ayaa ugu dambeyn ku amaaney Wasaaraddaha Caafimaadka iyo qorsheynta qiimeyntan ay sameeyeen oo noqoneysa sahankii ugu horeeyay tan iyo markii Galmudug la aas-aasey.
Kulankan ayaa gunaanadkiisa looga baaqey qorshe dajiyayaasha Galmudug oo ay kujiraan hey’addaha Dowladda iyo dhamaanba hey’addaha kale in maanta waxii ka dambeeya ay heli karaan xoggo kala duwan oo muhiim u ah wax ka qabashada baahiyaha dadka reer Galmudug.
