Madaxwaynaha dawlad Goboleedka Puntland Dr. Cabdiweli Maxamed Cali Gaas ayaa maanta oo ay taariikhdu tahay 03 January 2018 waxaa uu baneeyey waddooyin kala xirnaa ee magaalada Gaalkacayo ee xarunta Gobolka Mudug.
Madaxwaynaha Puntland ayaa waxaa ku welinayay banaynta waddooyinkaasi maamulka labada dhinac ee Gobolka Mudug iyo Degmada Gaalkacyo, mas’uuliyiin ka tirsan Golayaasha Puntland, saraakiil ka tirsan madaxtooyada, ganacsato, waxgarad, masuuliyiin ka socday Dowlad Goboleedka Galmudug, Taliska ciidanka isku dhafka Soomaaliyeed, taliya ciidamada Puntland iyo qaar ka mid ah saraakiisha ciidamada Puntland iyo Galmudug.
Dr Cabdiweli Maxamed Cali Gaas ayaa ugu horayn qaaday jid gooyadii ugu horaysay ee goobtaasi, waxaana ay ahayd jawaano ciid ah oo latuuray wadooyinka soo gala suuqa weyn ee magaalada Gaalkacyo, kala xirnaanta ganacsiga magaalada Gaalkacayo ayaa waxa ay carqalad ku ahaayeen ganacsiga, horumarka iyo Nabadda guud ahaan Gobolka Mudug, xirnaashaha wadooyinkaan ayaa waxaa sabab u ahaa dagaaladii ka dhacay magaalada kuwaas oo inta badan u dhexeeyay shacabka walaalaha ah ee kuwada nool magaalada Gaalkacyo.
“Wanaag badan ayaa ii muuqda sharaf bayna nootahay in aan maanta bartamihii suuqa Gaalkacayo isugu nimaadno, caqabadihii u danbeeyay oo taagnaa oo ahaa ciidda ladhoobay iyo kala xirnaanta ganacsiga in aan dhamystirno, shaqadii ay bilaabeen Madaxwaynaha Galmudug Axmed Ducaale Geelle Xaaf iyo Jenaral Cabdiweli Jaamac Gorod iyo Jenaralada halka inala taagan iyo maamulka Degmo ee Gaalkacayo iyo Gudoomiyayaasha gobolka dhammaantood aad ayay umahadsanyihiin shaqa fiican ayay bilaabeen dhamystirkii weyaan, anigu wax aan maanta meesha ujoognaa dad badan oo samaha jecel ayaa hawshaan ka qayb qaatay oo ay ugu horeeyaan oday yaasha ganacsatada”. ayuu yiri Madaxweynaha Puntland.
“Waxaan rajaynayaa cidwalbi in ay wanaagaas ka qay qaadato, ganacsade raba in uu iibsado bakhaarkiisa oo irsaaqad raadinaya hadana in ciidi ay utaal maaha wax sax ah, waxaan rabnaa marka meelkasta iyo jid kasta oo xiran oo Gaalkacyo ah waa in lafuraa maamulka gobolka kan degmada ciidamada dhammaantood amar ayay uqabaan in ay furaan cidna in aan loo tixgelin cidii caqabad kunoqota nabadgelyada iyo horumarka Gaalkacayo gacan bir ah in lagu qabto weeyaan”. ayuu yiri Madaxweynaha Puntland.
“Ciidankii Booliiska ee isku dhafka ahaa waa joogaa labada dhinacba, waa joogaan ciidankii milateriga ahaa meeshii ay degi lahaayeen waanu u astaynay waxaan rabnaa in lala shaqeeyo oo lagarab qabto oo lagu taageero nabada ay kashaqaynayaan waxaa laga shaqaynayaana waa horumarkiina, ganacsigiina, waa in ilmihiinu nabad wax ku bartaan. ayuu yiri Dr Cabdiweli Gaas.
Ugu danbayn, Madaxweynaha dawlad Goboleedka Puntland Dr. Cabdiweli Maxamed Cali Gaas ayaa kula dardaarmay kuna booriyey shacabka magaalada Gaalkacayo inay ka wada shaqeeyaan nabad gelyada, horumarka iyo xasiloonida magaaladooda, isla markaana ay u hogaan sanaadaan ciidamada ka shaqaynayaa amnigooda iyo xasiloonidooda.
