Maalintii 3-aad ayaa wafdi uu hogaaminayo madaxwaynaha dawlad goboleedka Galmudug C/kariin Xuseen Guuleed waxa ay ku suganyihiin magaalada Hobyo ee gobolka Mudug, halkaas oo ay ka socdaan kulamo maamulka bulshada kula tashanayo si loo dhiso maamulkii degmada Hobyo.
Wafdiga madaxwaynaha Maamulka Galmudug oo ay qayb ka yihiin wasiirada maamulka, Xildhibaano, ganasato iyo mas’uuliyiin kale ayaa intii aysan soo gaarin degmada Hobyo waxa ay soo mareen deeganada Baxdo, qaydaro, Bacaadwayn, Camaara, Wizil iyo Gawaan, halkaas oo si wayn loogu soo dhaweeyay.
Bulshada ku nool tuulooyinka iyo deegaanda ay wafdigu soo mareen ayaa waxa ay qabaan cabasho balaaran oo dhinaca adeegyada bulshada ka haysata.
Madaxwaynaha Dowlad goboleedka Galmudug ayaa sheegay in maamulkiisu uu yahay mid curdan ah, balse ay dareensan yihiin baahiyaha jira, kuwaas oo wax ka qabasho u baahan.
Dhinaca kale degmada Hobyo ayaa laga fulinayaa mashaariic ilaha dhaqaalaha sara loogu qaadayo, kuwaas oo ay ka midyihiin dhismaha dekadda Hobyo iyo hormarinta Garoonka diyaardaha magaalada.
Maalgashadayaal ka socda wadanka Ciraaq ayaa kormeeray qaabka loo suragalin karo dhismaha Dekadda, kulamana la qaatay madaxda Galmudug, sido kalena ganacsato rugta ganacsiga Galmudug iyo tan Soomaaliya ka socda ayaa ku sugan magaalada Hobyo, kuwaas oo qiimaynaya fursadaha la maalgashan karo.
