Madaxweynaha Dowlad Goboleedka Galmudug Axmed Cabdi Kaariye (Qoor-qoor) iyo wafdi uu hoggaaminayo oo ay ka mid yihiin Gudiga Dibu-heshiisiinta iyo Xubno kamid ah labada Gole ee Galmudug ayaa maanta gaaray magaalooyinka Xeraale iyo Huurshe si loo dhamaystiro Gogoshii nabadadda ee uu horay ugu furay beelaha walaalaha ee wada daga Xeraale iyo Huurshe Ra’iisul wasaaraha xukuumada Federalka Soomaaliya.
Socdaalkan oo ahaa midkii ugu horreeyey oo Madaxweynuhu ku tago meel ka baxsan Caasimadda Galmudug tan iyo markii la doortay ayaa Magaalooyinka Huurshe iyo Xeraale waxaa loogu soo dhaweeyay si diiran.
Madaxweyne Qoor-qoor iyo wafdigiisa ayaa kulamo kala duwan oo Huurshe iyo Xeraale ay kula yeeshen waxgaradka labada dhinac kadib waxaa ay dhinacyadu wadajir u aqbaleen dhameystirka heshiiska nabadda.
Guddiga dib u heshiista Galmudug iyo Xildhibaano ka tirsan Baarlamaanka Galmudug ayaa ehelada iyo qoysaska dadkoodii ku waayay dagaaladii Xeraale ku wareejiyey lacag samirsiin ah, taas oo qayb ka ahayd balanqaadyadii xukuumadda federaalka Soomaaliya ay usamaysay.
Ugu danbeyn Madaxweynaha Galmudug Axmed Cabdi kaariye Qoor-qoor ayaa ugu baaqay dhinacyadaan maanta la dhamaystiray heshiiskooda in ay ka dhabeeyaan balan qaadkooda si ay ugu wada noolaadan nabad.
