Madaxweynaha cusub ee dowlad goboleedka Galmudug Cabdikariin Xuseen Guuleed iyo ku-xigeenkiisa Maxamed Xaashi Cabdi ayaa maanta xarunta Madaxtooyada ee Cadaado waxay kulamo gooni gooni ah kula yeesheen qaybo kala duwan oo ka mid ah Maamulada Degmooyinka Gobolada dhexe iyo Ahlu Suna Waljamaaca, Taliyeyaasha ciidamada iyo Ururada Bulshada.
Madaxweynaha Galmudug ayaa kala hadalay Maamulada sidii loo wada shaqayn lahaa, isla markaana dowlad goboleedka Galmudug loo gaarsin lahaa meelaha kale ee ka baxsan inta ay ku gacanta ku hayaan iyo sidoo kale in gacantooda laga saaro meelaha ay hada ka taliyaan Al Shabaab, ammaankana dib loo soo celiyo.
Kulankii maanta ayaa ku soo dhamaaday is afgarad, waxaana laysla meel dhigay in labilaabo Wadashaqayn iyo in lagu baahiyo Maamulka Cusub dhamaan deegaanada gobolada Galgaduud iyo Mudug taas oo ay balan qaadeen kaqayb gala yaashii shirku.
Dhanka kale Warsaxaafadeed kasoo baxay Xarunta Madaxtooyada Galmudug ayaa lagu magacaabay guddi kasoo shaqeeya mudo 90 Maalmood ah wixii laqaban lahaa iyo Miisaaniyadda Dowlad goboleedka Galmudug in ay qiimeyn ku soo sameeyaan si dhaqso loogu gaaro hadafka ah horumarinta iyo balaarinta maamulka.
