Muqdisho, 6 September 2015: Madaxweynaha Jamhuriyadda Federaalka ee Soomaaliya, Mudane Xasan Sheekh Maxamuud ayaa maanta rasmi ahaan u furey tababarka ilaa 398 ruux oo dhowaan ku biirey Ciidammada Booliska Soomaaliyeed.
Madaxweynaha oo khudbad ka jeediyay munaasabadda ayaa ku bogaadiyey hoggaanka booliska tallaabada ay fursado shaqo iyo xirfadeedba ugu fidiyeen dhalinyaradan cusub ee ka soo baxay Jaamacadaha iyo dugsiyada sare ee dalka.
“Mar walba oo la xoojiyo tayada ciiddamada amniga, waxaa sii kordheysa kalsoonida lagu qabo iyo waxqabadka hay’adaheena amniga. Sharciga iyo kala dambeynta waxaa ay sal u yihiin in la helo dowladnimo caadil ah oo dadka si wanaagsan u xaq soorta’’ ayuu yiri Madaxweynaha.
Madaxweynaha ayaa sidoo kale booliska iyo hay’adaha sharciga xusuusiyey inaanu jirin cid sharciga ka sareysa.
‘’Waa in sharciga loo sinnaadaa, cid walbana la marsiiyaa sharciga haddii lagu helo inuu dembi galey. Qofna yaan loo eegin darajadiisa , saaxiibtinimo iyo waxyaabo kaleba mar hadduu sharciga jebiyey, waayo sinnaanta ayaa ah tan soo celin karta kalsoonida shacabka, isla markaana dhiseysa nidaam caafimaad leh oo ku dhisan kala dambeyn’’.
Taliyaha Ciidanka Booliska Soomaaliya, S/Gaas Maxamed Sheekh Xasan Xaamud ayaa sheegay in dhalinyaradan cusub ee haatan ku soo biirey ciidanka ay qeyb ka yihiin qorshaha dib u dhiska ciidammada iyo diyaarinta jiil cusub oo hawsha kala wareegi doona ciidanka hadda jira marka ay hawlgab noqdaan.
Munaasabadda waxaa kale oo ka soo qeybgaley Wasiirka Amniga Mudane Cabdirisaaq Cumar Maxamed, saraakiil ka tirsan ciidammada, diblomaasiyiin iyo mas’uuliyiin kale.
