Madaxweynaha Jamhuuriyadda federaalka Soomaaliya mudane Xasan Sheekh Maxamuud ayaa magaalada Muqdisho ka daah furey qorshaha istiraatiijiyada qaranka ee ka hor tagga argagaxisada rabshadaha wadata taas oo loo soo gaabiyo CVE isla markaana loogu magac daray TUBTA TOOSAN.
Munaasabadda lagu daah fureyay qorshan ayaa waxaa sidoo kale ka qeybgalay ra’iisul wasaaraha dalka ku xigeenkiisa, xubno ka tirsan labada gole ee dowladda, saraakiil ciidan oo uu kamid yahay taliyaha ciidanka booliiska Soomaaliya iyo mas’uuliyiin kale.
Xildhibaan Mustaf Sheekh Cali Dhuxulow, oo ah isku dubaridaha qorshahan ayaa munaasabadda ka sheegay in qorshahan uu soo socda 10 kii bilood ee la soo dhaafay isla markaana uu hadda meel wanaagsan marayo loona baahan yahay in laga wada shaqeeyo.
Madaxweynaha Soomaaliya mudane Xasan Sheekh Maxamuud ayaa sheegay in Soomaaliya hadda leedahay qorshe qaran oo ah ka hortagga argagaxisada taas oo keeni doona in la yareeyo fekirka argagaxisada iyo saameyntiisa.
“Anaga oo ah madaxda Soomaalida waxaan u xil saarnay qorshaha istiraatiijiyada ka hortagga argagaxisada Xildhibaan Mustaf Dhuxulow si uu ugala shaqeeyo hey’adaha arimahan ay quseyso ayagoo sidoo kale la kaashanaya maamulada dalka ka jira iyo ururada bulshada rayidka ah,” ayuu yiri madaxweynaha.
Mudane Xasan Sheekh Maxamuud madaxweynaha jamhuuriyadda Soomaaliya ayaa sidoo kale, waxaa uu u mahadceliyay xildibaan Mustaf Dhuxulow iyo Engineer Yariisow oo barnaamijkan ka wada shaqeeyay, isagoo sidoo kale u mahad naqay midowga Yurub oo qorshahan sidoo kale gacan ka geystay.
Madaxweynaha ayaa sidoo kale, waxaa uu sheegay in qorshahan uu wax badan ka tari doona adkeynta amniga qaranka.
“Sababta aan ugu baahannahay istiraatiijiyada qaran ayaa ah maadaama dhalinyaradeena ay inta dhibane u yihiin argagaxisada rabshadaha wadata. Argagaxisada rabshadaha wadata waxaa ay saameeyaan carruur aad u da’yar sidaa darteed waa qorshe anaga leenahay,” ayuu markale yiri madaxweynaha.
Ugu dambeyntii madaxweynaha dalka ayaa ugu baaqay qaramada midoobay in qorshahan laga hergeliyo guud ahaan wadamada caalamka si looga hortago fekirka argagaxisada ee dhibaatada ku haya caalamka, isagoo sheegay in uu ku faraxsan yahay in Soomaaliya qorshahan ay fulisay kuna dhaqmayso.
