Madaxweynaha jamhuuriyadda federaalka ah ee Soomaaliya mudane Xasan sheekh Maxamuud ayaa maanta xaflad sagootin ah loogu sameeyay magaalada dhuusamarreeb ee xarunta gobolka galgaduud ,
Xafladda Sagootinta waxaa ka qayb galay xubno ka mid ah maamulka gobolka odayaal dhaqameed iyo qeybaha bulshada.
Guddoomiyaha gobolka galgaduud Xuseen Cali Wehliye oo goobta ka hadlay ayaa sheegay.
“Waxaan Xafladdaan u samaynay in aan ku sagootino wufuudda Madaxweynaha dalka waxaana ku sagootinaynaa siniyadd wanaag ah inagoo ah dadka dega gobolada mudug iyo galgaduud waxaana leenahay ku soo dhawaada gobolka” ayuu yiri guddoomiye Cirfo.
Dhinaca kale wasiir kuxigeenka Dastuurka Dowladda federaalka ah ee Soomaaliya Cabdullaahi Yuusuf “Alankay” ayaa sheegay in uu soo idlaaday shirkii dib u heshiisiinta dadka dega gobolada mudug iyo galgaduud islamarkaana wixi haatan ka dambeeya loo gudbay in uu furmo shirka dhismaha maamul ay yeeshaan dadka ku nool gobolada Mudug iyo galgaduud.
Ugu dambayn Madaxweynaha Jamhuuriyadda federaalka ah ee Soomaaliya mudane Xasan Sheekh Maxamuud oo soo xiray xafladda loo sameeyay ayaa sheegay in dadka dega gobolada mudug iyo galgaduud ay muujiyeen dhabar adeeg islamarkaana ay diyaar u yihiin in maamul ay samaystaan dowladdana ay tageerto.
“Balanteenu waa in aan samaysanaa maamul doorka Dowladda waa diyaar waxaa jiri kara in dadka qaar ay kala aragti duwanan karaan laakiin Dowladdu waxa ay isku dayaysaa in la dhameeyo qaybta ka hartay dhamaystirka mamulkaan waa in la muujiyaa in deegaankaan uu yeesho maamul si uu ula sooboxo mas’uuliyiin tiisa ugana shaqeeyo horumarka dadkaan Dowladduna taageerto” ayuu yiri Mudane Xasan sheikh madaxweynaha dalka.
11’ka Bishaan ayaa la filayaa in si rasmi ah uu u furmo shirka maamul u samaynta dadka dega gobolada mudug iyo galgaduud.
