Wafdi uu hogaaminayay Ra’isul wasaaraha Dalka Ethiopia Hailemariam Desalegn oo gaaray Magaalada Jabuuti ayaa kulamo la qaatay madaxda dalkaasi oo uu ugu horeeyo Madaxweyne Jamhuuriyadda Jabuuti Ismaaciil Cumar Geele oo ay ka wada hadleen arrimo kale duwan oo la xiriira dalalka Geeska Africa iyo xiriirka Jabuuti Iyo Ethiopia.
Ra’isul wasaaraha Dalka Ethiopia Hailemariam Desalegn iyo madaxweynaha Dalka Jabuuti Ismaaciil Cumar Geele oo kulan wada qaatay ayaa ka wada hadlay horumarka, iskaashiga labada dal, iyo Ammaanka geeska Africa oo ay Soomaaliya ku jirto iyo dhibaatooyinka Ereteria ay ku heyso gobolka Geeska Africa oo ay isku raaceen mas’uuliyiintaasi in ay hor dhigi doonaan dhibaatada Ereteria ay ku heyso dadka ku dhaqan wadamada Geeska Africa.
Madaxweyne Ismaaciil Cumar Geelle iyo Ra’isul wasaare Hailemariam Desalegn ayaa goob joog ka ahaa hishiisyo ay kala saxiixdeen qaar ka mid ah wasiirada Dowladaha Jabuuti iyo Ethiopia, iyadoo hishiisyadaasi ay ku qotomaan arrimo la xiriira iskaashiga iyo xoojinta xiriirka labada dal.
Hishiisyada iyo kulamada ay wada qaateen mas’uuliyiinta labadaasi dal ayaa qeyb ka ah xoojinta xiriirka iskaashi ee ka dhexeeya wadamada Geeska Africa oo xusul duub ugu jira in ay horumariyaan gobolka islamarkaana meel ay uga soo wada jeestaan cid kasta oo dhibaato u keeni karta.
