Madaxweynaha Jamhuuriyadda Federaalka Soomaaliya mudane Maxamed Cabdullaahi Farmaajo ayaa xeeriyay abuurista Golaha Dhaqaalaha Qaranka.
Xeerka madaxweyne oo lambarkiisu yahay 98 ayaa qeexaya in madaxweynuhu markii uu arkay Qodobbada 87 iyo 90 ee Dustuurka KMG ee Soomaaliya iyo war-murtiyeedkii laga soo saaray Shirka Golaha Amniga Qaranka (Baydhabo 3-5 Juun 2018, Qodobka 2.11
Markii uu garwaaqsaday soo jeedinta wasiirka Wasaarada Qorsheynta Qaranka iyo baahida loo qabo in la abuuro Gole Dhaqaale Qaranka ee ka talo bixiya arrimaha la xiriira Siyaasadda Dhaqaalaha ee Dalka.
Madaxweynuhu waxa uu soo saaray xeerkan oo qodobkiisa koowaad yahay Dhismaha Golaha Dhaqaalaha Qaranka.
Qaab dhismeedka Golaha Dhaqaalaha Qaranku waxa uu ka kooban yahay
1- GUddi hoosaadka Dhaqaalaha ee Golaha Wasiirrada
2- Guddoomiyaha Bangiga Dhexe
3-Madaxda Dowlad goboleedyada
4-Shan (5) Xubnood oo la taliyeyaal ah (National Advisory) oo lagu soo xulo aqoontooda Cilmiga dhaqaalaha iyo khibraddooda dhaqaalaha isla markaana aqoon dheer u leh maamulka maaliyadda dowladda, kuwaas oo kala taliya golaha dhanka farsamada iyo diyaarinta dokumentiyada la hor geynayo golaha.
Mas’uuliyadda Golaha Dhaqaalaha Qaranka ayaa noqoneysa sida xeerku caddeynayo:
1- Kala talinta Dowladda dhaqaalaha iyo diyaarinta istiraatiijiyadda siyaasadda dhaqaale iyo maaliyadeed ee dalka.
2-Waxa uu dowladda kala talinayaa sida ugu habboon ee lagu hanan karo himilooyinka dhaqaale iyo maaliyadeed ee heer Qaran
3-Waxa uu talo ka bixinayaa shuruucda arrimaha Federaalka ee la xiriirta dhaqaalaha iyo kheyraadka dalka
4- Waxa uu ka caawinayaa dowladda u hoggaansanaanta qawaaniinta gudaha iyodibadda ee la xiriirta arrimaha dhaqaalaha iyo shuruudaha waajibaadka taageerada maaliyadeed e dibadda laga helo.
