Madaxweynaha dowlad goboleedka Jubaland Axmed Maxamed Islaam, ayaa soo dhaweeyay go’aanka guddiga doorashooyinka Federaalka oo maanta iclaamiyey deegaan doorashada labaad ee Jubbaland.
Madaxweynaha Jubbaland ayaa sidoo kale sheegay in mar walba ay muhiim tahay in gobolkaas ay ka soo baxaan Xildhibaano ku yimid rabitaanka bulshada deegaanka.
“Madaxweynaha ayaa ku booriyay guddiyada doorashooyinka ee kala duwan inay sida ugu dhakhsiyaha badan kusoo gaba gabeeyaan doorashooyinka xildhibaanada ee deegaan doorashada labaad ee Jubaland, si looga faa’iidaysto wakhtiga oo dib u dhac kale aanu u iman. Madaxweynaha ayaa ugu baaqay dadweynaha ku nool magaalada Ceelwaaq inay kala shaqeeyaan hey’adaha amniga nabad-galyada deegaanka, soo dhawaynta martida iyo ergooyinka ka qeyb qaadanaya doorashooyinkan,” ayaa lagu yiri qoraal ka soo baxay Madaxtooyada Jubbaland.
