Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa ka khudbad ka jeediyey shirka caalamiga ah ee dhaqaalaha iyo maalgashiga Masar oo ka socda magaalada Sharm El Sheik.
Madaxweyne Xasan oo ka mid ahaa madaxda tirada badan ee caalamka ee shirka lagu casuumey ayaa ugu horeyntii ku ammaaney Masar dhabbada ay hayso ee dhinaca qaabeynta mustaqbalka dhaqaalaha dalka oo uu sheegay inay ka faa’idi doonaan waddamada Carabta iyo qaaradda Afrika.
‘’Waa muhiim in waddamadeena ay horumariyaan siyaasad qeexan oo lagama maarmaan u ah kobcinta maalgashiga shisheeye iyo kan gudaha, waxayna taasi kaalin muuqata ka qaadaneysaa dhaqaalaha oo kordha. Waxaan dhammaanteen halkan isugu nimid inaan isweydaarsano fikrado la xiriira qaabka aan himiladaasi ku gaaro karno iyo inaan ka sii taxaddarno caqabadaha naga hor imaan kara iyo sida looga gudbi karo’’, ayuu yiri Madaxweyna Xasan Sheekh Maxamuud”.
Waxaa kale oo uu madaxweynaha intaa ku darey in talaabada Masar ay qaadeyso ee dhinaca horumarinta dhaqaalaha iyo maalgashiga ay xal wanaagsan u noqon karto mashaakilaadka dhinaca bulshada ee waddamo badan ka taagan.
‘’Maalgashiga iyo in la sugo kobaca dhaqaalaha waxay si toos ah xiriir ula leeyihiin hadba sida aan ula tacaalno siyaasadaheena qaran ee la xiriira la dagaalanka faqriga iyo sinaan la’aanta, sidaa darted talaabadan waxay dawo u tahay in bulshada loo jiheeyo dhanka horumarka. Waxaan aaminsanahay inay muhiim tahay in sidoo kale la maalgashado horumarinta xirfadaha bulshada sida inay helaan waxbarasho aasaasi ah iyo mid heer sare intaba, loona abuuro fursado ay si siman uga wada faa’ideysan karaan’’.
Madaxweynaha waxaa uu sheegay in shirkan Sharm El Sheikh ay Soomaaliya wax badan ka baran karto, muhiimna uu u yahay barnaamijyada dib u dhiska Soomaaliya, maadaama ay shirkan joogaan dalal ilaa 80 gaaraya iyo boqolaal shirakadood oo caalami ah.
Madaxweynaha ayaa sidoo kale xarunta shirkan uu ka socdo kulamo kula qaatey Madaxweynaha Masar Abdel Fattah el-Sisi, Ra’iisul Wasaaraha Ethiopia, Haile Mariam Desalegn, Xoghayaha Guud ee Jaamacadda Carabta Dr. Nabil El Araby, Wasiiirka Arrimaha Dibedda ee Dowlada Isutagga Carabta Sheikh Abdullah bin Zayed Al Nahyan iyo madax kale.
Mareykanka ayaa waxaa shirkan uga qeybgalaya Xoghayaha Arrimaha Dibedda, John Kerry.
Dhanka kale xubnaha wafdiga madaxweynaha oo ay ka mid yihiin Wasiirrada Isgaarsiinta, Guuleed Xuseen Qaasim, Batroolka, Maxamed Mukhtaar Ibraahim, Wasiiru Dowlaha Arrimaha Dibedda Khaalid Cumar Cali iyo Wasiir ku Xigeenka Qorsheynta Cabdullaahi Sheekh Cali, waxay kulamo muhiim ah la qaateen wasiiro iyo madaxda shirkado caalami ah oo shirka jooga, iyagoo ka wadahadley horumarinta iyo maalgashiga Soomaaliya.
