Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud oo maanta tagay degmada Cadaado ee gobolka Galgaduud, ayaa caawa kulamo ku aaddan qabsoomidda shirka maamul u sameynta Mudug iyo Galgaduud la leh, siyaasiin, xildhibaanno, odeyaal dhaqmeen iyo guddiga arrintaasi u xil saaran.
Madaxweyne Xasan Sheekh Maxamuud, ayaa markii uu Cadaado tagay waxaa uu booqdey xarunta lagu qaban doonu shirweynaha maamul u sameynta gobollada Mudug iyo Galgaduud, waxaana uu soo indha-indheeyey qeybaha xarunta iyo sida loo diyaariyey, isagoo uga mahadceliyey dhammaan dadkii gacanta ka geystay diyaarinta madasha.
Madaxweynaha Soomaaliya, ayaa si gaar gaar ah ula kulmaya caawa odayaasha dhaqan iyo siyaasiinta ka jeedda Mudug iyo Galgaduud, iyadoo uu kala hadlayo hannaanka furitaanka shirka iyo mudada uu soconayo shirkaasi, maadaama uu muhiim u yahay bulshada gobolladaasi ka jeedda, qeybna uu ka yahay hirgelinta maamullada kmg ah ee u gudbi doona dowlad gobolleedka ka tirsan dowladda Federaalka Soomaaliya.
Madaxweynaha ayaa dadaal badan ku bixinaya sidii looga miradhalin lahaa shirkii dib u heshiinneed ee ku qabsoommay Dhuusa-mareeb, iyadoo maalinta berito ah lagu wado in uu si rasmi ah madaxweynuhu u furo shirka maamul u sameyn, Galgaduud iyo Mudug.
