Kumanaan kamid ah, dadka ku nool magaalada Muqdisho oo ka qeybgalay munaasabadda lagu wey weynayay maalinta xorriyadda ee 1-da Luulyo oo maanta lagu qabtay garoonka kubadda cagta ee Banaadir Stadium ayuu madaxweynaha jamhuuriyadda Soomaaliya mudane Maxamed C/laahi Maxamed Farmaajo u khudbeeyay.
Madaxweynaha, ayaa ka hadlay qiimaha maalintan, isagoo sheegay in waxyaabaha gumeystiyaashii ay u adeegsadeen dadka Soomaaliyeed ay kamid aheyd qabiyaaladda iyo kala qeyb qeybinta umadda Soomaaliyeed.
Related posts
Mudane Farmaajo, madaxweynaha dalka ayaa sidoo kale, xusay in astaamaha ay isaga egyihiin kooxaha argagaxisada iyo gumeystiyaasha ay tahay kala qeybinta iyo qabiyaaladda, waxaana uu shacabka ku booriyay in ay isku duubnaadaan isla markaana dowladda aaminaan.
“Maanta waxaad heysataan dowlad wanaagsan oo ka shaqeynaysa soo celinta sharafta iyo karaamada umadda Soomaaliyeed, waa in aad la shaqeysaan,” ayuu sheegay madaxweynaha.
Madaxweynaha Soomaaliya, ayaa sidoo kale tilmaamay in Soomaaliya aysan tabar darneyn haddii shacabka Soomaaliyeed garab istaagaan dowladdooda.
“Dadka doonaya in ay shacabka dowladooda ka hor keenaan waxaa ay raadinayaan waa sharci la’aan,” ayuu yiri Madaxweynaha.
Mudane, Maxamed C/laahi Farmaajo, madaxweynaha dalka, ayaa shacabka Soomaaliyeed faray in ay la shaqeeyaan ciidanka ammaanka, si kooxaha nabad diidka ah loola dagaalamo lana xoreeyo wadanka.
Madaxweynaha ayaa sheegay in dowladda ay ku howlan tahay sidii awooda shacabka loogu soo celin lahaa, taas oo micinaheedu yahay in shacabku ay dooran karaan cidda ay doonayaan. Waxaa uu intaa ku daray in dalka maanta jaho wagaansan u socdo.
Madaxweynaha, ayaa si weyn carabka ugu adkeeyay dagaalada muddooyinkan dambe ku soo laa laabanayay deegaanka Tuka-raq ee gobolka Sool, isagoo ku baaqay in colaadaas i shuruud la’aan ah loo joojiyo, isla markaana ummadda Soomaaliyeed maanta aan u baahneyn dagaal iyo dhiig micno la’aan lagu daadiyo.
Arrinta Soomaaliland ayuu madaxweyne Farmaajo, sheegay in maamulkiisa ka go’an tahay dib u soo celinta wada hadaladii u dhexeeya Soomaaliya iyo Soomaaliland.
“Wax kasta, oo aan ku kasban karno kalsoonida walaalaheena Soomaaliland, waan sameynaynaa, maxaa yeeley waa gacanteena naga maqan la’aanteeda ma ahaan karno,” ayuu sheegay madaxweynuhu.
Ugu dambeyn, madaxweynaha ummadda Soomaaliyeed, mudane Maxamed C/laahi Maxamed Farmaajo ayaa khudbadiisa qiimaha badneyd waxaa uu ku soo gabagebeeyay, ahmiyadda ay leedahay wadaniyadda, waxaana uu sheegay ” Wadaniyadu ma ahan hadal ee waa ficil”.
