Madaxweynayaasha dalalka Maraykanka iyo Ruushka oo kulan ku yeeshay New York ayaa isku khilaafay arrimaha Bariga dhexe iyo dagaalka ka socda Siiriya, iyagoo khudbado lidi isku ah ka jeediyay Shirweynaha Qaramada Midoobay.
Vladimir Putin iyo Barack Obama oon wax kulan ah yeelan muddo 2 sano ah, ayaa xalay kulan gaar ah ku yeeshay magaalada New York, kulankaasi ayaan wax natiijo ah kasoo bixin kadib markii ay labada dhinac isku afgaran waayeen qaabka loo wajahayo xal u helidda dagaalka ka socda dalka Siiriya.
Madaxweyne Obama ayaa khudbadii uu shalay ka jeediyay golaha loo dhan yahay ee Qaramada Midoobay ku sheegay in loo baahan yahay in xal nabadeed laga gaaro arrinta dalka Suriya, isagoo meesha ka saaray in xukuumada Bashaar Al Asad ay xukunka sii heyn karto.
Hogaamiyaha Maraykanka ayaa qiray in Maraykanka kaligiis uusan xallin karin dhibaatooyinka dunnida ka jira, isla markaana diyaar u yihiin inay la shaqeeyaan dal walba.
Vladimir Putin ayaa isagu khudbadiisa ku sheegay in loo baahan yahay in lala shaqeeyo dowladda Sharciga ah ee Siiriya, wuxuuna ka digay dalalka Reer Galbeedka inay dal walba faraha la galaan, isagoo sheegay in dalalka caalamka ay kala duwan yihiin loona baahan yahay in dal walba uu tixgeliyo dhaqanka iyo madax-banaanida dalalka kale
