Madaxweynaha Jamhuuriyadda fedraalka Soomaaliya Mudane Maxamed Cabdullaahi Farmaajo ayaa ka qeyb galay munaasibad ay ku qalin jabinayeen dufcadda 20-aad ee jaamacadda Ummadda Soomaaliyeed.
Munaasibadaan sidoo kale waxaa ka qeyb galaya Wasiiro, Xildhibaano, Wasiir ku xigeen arimaha dibadda Talyaaniga,Safiiro, Quburo wax ka dhigta Jaamacaddaha caalamka, iyo Bahda waxbarashadda dalka.
Munaasibadu intii ay socotay mas’uuliyiinta Jaamacadda Ummaddu ku soo bandhigeen guulaha wax ku-oolka ah ee ay gaartay Jaamacadda Ummadda Soomaaliyeed oo lagu sameeyay isbadelo dhowr ah si ay u soo saarto Ardo leh aqoon ku filan oo ay dalkooda wax ugu qabtaan.
Madaxweynaha qaranka Mudane Maxamed Cabdullaahi Maxamed ayaa Gaban-gabadii munaasibada ka jeediyay khudbad dheer oo uu kula dar-daarmay Ardeyda Soomaaliyeed oo maanta nasiibka u yeeshay in ay noqdaan dufcaddii ugu horeysay ee Jaamacadda Ummadda ka qalinjabiya tan iyo bur-burkii dalka.
Madaxweyne Farmaajo ayaa kula dar-daarmay Ardadda in ay yeeshaan qorshe iyo hadaf ay wax ugu qabtaan naftooda, iyo dalkooda isagoona faray in looga baahanyahay in ay gudaan deynta lagu leeyahay maadaama ay si lacag la’aan ah dowladoodu wax u bartay.
Madaxweynaha Dalka ayaa sidoo kale khudbadiisa ku soo hadal qaaday guulaha la taaban karo ee dalkeenu ku tilaabsaday, waxa uuna mid mid isku dultaagay waxyaabaha lagu guuleystay qabashadooda, guulaha dhow, iyo mustaqbalka quruxda badan ee dalkeena.
Madaxweyne Farmaajo ayaa sheegay in caalamku qiray guulaha muuqda ee dalkeena waxa uuna tusaale u soo qaatay Madaxa Hay’adda USAID ee Soomaaliya oo sheegay in Soomaaliya sameysay horumaro muuqda oo laga sameeyay dhinacyada Maamul wanaaga, Hufnaanta, iyo dib u dhiska Hay’adaha dhaqaalaha dalka.
Ugu dambeyn madaxweynaha qaranka ayaa ka hadlay dib u dhaca ay dalkeena ku keeni karto kala qoqobnaantu iyo faa’iidadda ay dalkeena iyo dadkeenaba u leedahay midnimada iyo wadajirku isagoona ugu baaqay Ummadda Soomaaliyeed in ay Dowladooda garab istaagaan.
Jaamacadda Ummadda Soomaaliyeed oo ka mid aheyd Hay’adihii dalkeena ee ku bur buray dagaaladii sokeeye ayaa dib loo howl galiyay sanadkii 2014-kii.
