Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa u tacsiyeeyay Ehelada Dadkii ku waxyeelloobay qaraxii waxashnimada ahaa ee ay argagixisadu Saaka ka geysatay Degmada Hodan ee Gobolka Banaadir.
Qaraxan oo ay xubno ka mid ah Shacabka iyo Ciidanka Dowladduba ku Nafwaayeen, ayaa sidoo kale waxa uu bur-bur xooggan u geystay Masjid, Guryo iyo Meherado halkaa ka dhawaa, taas oo muujineysasida kooxdan Dhiigya cabka ah aysan ugu kala soocneyn Dadka Soomaaliyeed iyo goobaha cibaadada, balse bartilmaameedkoodu uu yahay burburin, dil iyo naafeyn oo kaliya.
Kooxda Al-Shabaab ayaa Barqanimadii Maanta Gaari Miineysan ku weeraray Xarunta Degmada Hodan ee Gobolka banaadir, iyagoo halkaasi ku laayay Shacab iyo maati Soomaaliyeed oo aan waxba galabsan.
Horraantii Bishan ayay ahayd markii ay sidan oo kale Kooxda nabad diidka ah ee Al-Shabaab weerar bahal-nimo ah ka geysteen xarunta Degmada Howl-wadaag ee Gobolka Banaadir, halkaas oo sidoo kale ay ku laayeen Carruur dhiganeysay Dugsi Qura’aan iyo Arday Iskuul, iyagoo bur-buriyay Masjid, Guryo iyo Madaaris wax barasho, taas oo astaan u ah dabar goynta Ummadda Soomaaliyeed.
