Madaxweyne ku-xigeenka Dowlad Goboleedka Galmudug Mudane Cali Daahir Ciid oo ku sugan Degmada Caabudwaaa ayaa kulan looga hadlayay Amniga Degmada waxaa uu la yeeshay Maamulka Degmada iyo Taliyayaasha u xilsaaran Nabadgelyada Degmada iyo deegaannada ku xeeran.
Kulanka oo intiisa badan looga arinsanayay amniga Degmada ayaa sidoo kale waxaa la faray saraakiisha nabadgelyada inay hawlgeliyaan ciidamada u xilsaaran amniga ee dhawaan loo carbiyay Xasilinta degmada.
Gudoomiyaha Degmada Caabudwaaq Faarax Cabdulle Xasan (Samadoon) oo markii uu soo xirmay kulanka lahadlay Warbaahinta ayaa la wadaagay qodobadii kulanka ka soo baxay oo ay ugu weyneyd xoojinta Nabadgelyada iyo isdhexgalka bulshada, lagana hortago cidkasta oo qalqalgelineysa amniga.
Faarax Cabdulle Xasan ayaa xusay in ciidamada amniga ay habeen iyo maalin degmada iyo deegaannada ku xeeran ka sameyn doonaan howlgallo nabadgelyada lagu xoojinayo, isla markaana qofkii qalqal amni sameeya, laga qaadi doono talaabo sharaciga waafaqsan.
“Magaalada qofkii lagu arko isaga oo qori wata ay ciidamada awood u leeyihiin inay kala wareegaan hubkaas, isla markaana aan loo celin doonin, qofkii isna dagaal kala horyimaada ciidamada amniga laga qaadi doono talaabo sharciga waafaqsan, iyadoo loo marayo hannaanka uu sharciga dhigayo”. Ayuu yiri Guddoomiye Cabdifataax.
