Qoysaskaan oo kaamam cusub ka samaynaya duleedka magaalada Xudur ayaa waxay ka soo barakaceen deegaannada Ceelgodow, Fadhigaale iyo deegaanno kale oo Gobolka Bakool ka tirsan, waxana barakacooda sabab u ah abaaraha dalka ka jira.
Guddiga digniinta abaaraha iyo masiibooyinka Gobolka Bakool iyo hay’adaha ACF ayaa maanta kormeerey goobaha qoysaskaan cusub fariisimaha ka samamyteen, waxayna wax ka weydiiyeen xaaladoda nololeed, qoysaska oo u badan haween waayeel iyo carruur ayaa waxa ay ka warbixiyeen in adeegyadii aasaasiga u ahaa nolosha aadanaha aan waxba ka haysan, xoolihiina ay abaartu ka dhameysay.
Intaa ka dib guddiga waxa ay indha indheyn ku sameeyeen Ceelasha biyaha magaalada Xudur waxana dul tageen ceelal marhore biyo ka go’een iyo qaar kale oo biyahooda gabaabsi yihiin dad iyo duuyana habeen iyo maalin dul fadhiyaan, biyaha waa wasakh dadka iyo xoolaha cabaya waxay halis ugu jiraan xanuunada biyaha wasakhda ah ka dhasha.
Xoolaha muuqaal ahaan aad ayay caato u yihiin meelaha qaar waxaad ku arkaysaa xoolo abaarta awgeed u bakhtiyay, waxaana Wariyaha Warbaahinta Qaranka ee Goboka Bakool Maxamed Cabdiraxmaan uu lakulmay oday waayeel ah oo meel fog xoolo ka soo arooriyey welina aan biyo u helin, maadaama ay biyo yari ka jirto ceelasha magaalada.
Qaar ka mid ah guddiga digniinta abaaraha iyo musiibooyinka oo warbaahinta la hadlay ayaa sheegey in xaalado bani’aadanimo ay ka jirto gobolka Bakool, una baahan in deg deg loogu soo gurmado.
