Madaxweynaha Mareykanka Barack Obama ayaa lagu wadaa in saacadaha soo socda ee maanta uu gaaro Magaalada Nairobi ee xarunta dalka Kenya, halkaasi oo uu ka jiro diyaar garow xoogan oo lagu soo dhoweynayo Obama.
Obama ayaa Kenya tagi doona markii u horeysay isagoo Madaxweyne ah, halkaasoo uu aabihii ka soo jeedo, waxaa uu kenya ka tagay sanadkii 2006-dii, isagoo ahaa Sentaro ka tirsanaa Aqalka Congress-ka Mareykanka.
Ammaanka magaalada Nairobi ayaa si aad ah loo adkeeyay, waxaana la xirayaa wixii ka dambeeya 2-da duhurnimo wadooyin badan oo muhiim ah, sidoo kale hawada Kenya ayaa saacad ku dhow xirnaan doonta.
Illaa 10-kun oo boolis ah ayaa ka qeyb qaadanaya sugida amniga, waxaana dowladda Kenya ay sheegtay inay si weyn ugu diyaar garowday booqashada Obama uu ku imaanayo Kenya.
Sidoo kale Ciidamo Mareykan ah ayaa ka qeyb qaadanaya sugida ammaanka inta uu joogo Obama dalka Kenya, waxaana la arkayay diyaarado qumaatiga u kaca iyo ciidamo ku sugan goobo kala duwan oo ku yaalla Nairobi.
Madaxweyne Obama ayaa caawa fiidkii marka saacada geeska afrika tahay 7:30 ku soo beegan, waxaana uu ka soo degi doonaa garoonka diyaaradaha Joma Kenyatta oo ammaankiisa si weyn loo adkeeyay.
Waxaa uu maalinta berri kaga qeyb geli doonaa shir ku saabsan arrimaha Ganacsiga, waxaana Obama uu kulan gaar ah la qaadan doonaa Madaxweynaha Kenya Uhuru Kenyatta oo ay ka wada hadli doonaan arrimaha ammaanka, gaar ahaan la dagaalanka Argagixisada.
Booqashada Obama ee Kenya kadib waxaa uu maalinta Axad u gudbi doonaa dalka Itoobiya, gaar ahaan magaalada Addis Ababa, waana markii u horeysay ee Madaxweyne Mareykan ah oo booqda dalka Itoobiya, isagoo khudbad ka jeedin doona xarunta Midowga Afrika.
