Madaxweynaha Jamhuuriyadda Federaalka ah ee Soomaaliya Mudane Xasan Sheekh Maxamuud oo ku sugan magaalada Dhuusamareeb ee xarunta Gobolka Galgaduud ayaa kulamo weli kula leh halkaasi qeybaha kale duwan ee bulshada gobolada dhexe ee uu kala hadlayo arrimaha la xiriira dar dargalinta howlaha maamul u sameynta gobolada dhexe.
Madaxweyne Dalka Mudane Xasan Sheekh Maxamuud ayaa odoyaasha kala hadlay sidii natiijooyin wax ku ool ah ay uga soo bixi lahaayeen shirka dib u heshiisiinta ee Dhuusamareeb, isagoo intaa ku daray Madaxweynuhu in dowladda ay mar waliba garab taagantahay dhaqan gelinta go’aanada dib u heshiisiineed ee ka soo baxa shirka.
Wariyaha Warbaahinta Qaranka ee Gobolka Galgaduud Maxamed-deeq Cabdi Maxamed ayaa ku soo waramaya in kulamada uu Madaxweynuhu laaqatay odoyaasha dhaqanka iyo siyaasiyiinta ay ahaayeen kuwa diiradda lagu saaray sidii loo dar dargelin lahaa dhameystirka shirka dib-u-heshiisiinta ee Dhuusamareeb iyo ka qeyb galka shirka maamul u sameynta gobollada Mudug iyo Galgaduud.
Madaxweynaha Jamhuuriyadda Soomaaliya mudane Xasan Sheekh Maxamuud ayaa habeenkii labaad ku hoyday magaalada Dhuusa mareeb, iyadoo madaxweynaha uu dadaal ugu jiro sidii loo dar dar galin lahaa maamul u sameynta gobolada Mudug iyo Galgaduud, waxaana safarka madaxweynaha ee galgaduud uu qeyb ka yahay dadaalada Dowladda Soomaaliya ay ugu jirto hirgalinta Nidaamka Federaalka ah.
