Madaxweynaha Soomaliya Xasan Sheekh ayaa u sheegay wakaaladda wararka Anatoly ee dalka Turkiga in dowladdiisu ay horumarro ka sameysay la dagaalanka Al-shabaab.
Madaxweynaha jamhuuriyadda Federaalka ah ee Soomaaliya Mudane Xasan Sheekh Maxamuud ayaa xusay in ciidammada Dowladda ay gacanta ku dhigeen meelo badan oo ay horay u maamuli jirtay Kooxda Al-shabaab, isgoo intaa ku daray in ay la kaashadeen dagaalka looga soo horjeedo Al-shabaab AMISOM; isagoo in taa raaciyay in nabadda ay kusii baahayso Soomaaliya oo dhan.
“Ciidammada Dawladda Soomaaliya oo kaashanaya kuwa AMISOM haatan waxay ka taliyaan Deegaanno badan oo dalka ah. iyadoo Al-shabaab meelo aad u kooban ay haatan ku sugan yihiin,” ayuu intaa raaciyey Madaxweyne Xasan oo la hadlay Wakaaladda Anatoly ee dalka Turkiga.
Sidoo kale, Madaxweynaha Soomaaliya ayaa tilmaamay in xaaladda dalka ay aad u wanaagsan tahay, dadkuna intooda badan ay dareemayaan in ay nabad ku joogaan Deegaannadooda oo markii hore ay ka barakaceen.
Madaxweyne Xasan Sheekh ayaa ku tilmaamay boqoashadii wafdigii uu hoggaaminayay Madaxweynaha Turkiga Recep Tayyip Erdogan ay ku yimaadeen Muqdisho mid taariikhi ah, isla markaana ay wax badan oo muuqda ka badeshay dareenka beesha caalamka ee ku wajahanArrimaha Soomaaliya.
“Turkigu waa walaalo muhiim u ah Soomaaliya’Waxaan soo dhaweynayaa dadaalka Madaxweynaha Turkiga ee ku aaddan caawinta Dowladda iyo shacabka Soomaaliyeed.” ayuu yiri Madaxweynaha Dowladda Soomaaliya Xasan Sheekh.
Ugu dambeyn, Madaxweynaha ayaa sheegay in xiriirka Turkiga iyo Soomaaliya uu yahay mid horay u socda, ayna iska kaashanayaan labada waddan dhinacyo badan oo ay horumarinta dalka ku jirto, sida ammaanka , dhismaha ciidammada ,dib u dhiska caasimadda, sameynta Warshadaha iyo bixinta Kaalmooyinka bini’aadannimo ee Soomaaliya.
